«Մեզ ասում են՝ մի փոքր իջեցրեք նշաձողը Արցախի հարցով և միջազգային լայն կոնսոլիդացիա կունենանք»։ Կառավարության հետ հարցուպատասխանի ժամանակ իր հարցը Նիկոլ Փաշինյանի հայտարարությամբ սկսեց «Հայաստան» խմբակցության պատգամավոր Աղվան Վարդանյանը։
«Մի փոքրը ինչքա՞նն էր, 10 սմ, թե՞ կիլոմետրեր. իջեցրել ենք 0-ի։ Արցախում հայ չկա, Արցախի ռազմաքաղաքական ղեկավարությունը, ձեր ամենօրա խոսակից Արայիկն էլ Բաքվի բանտում են»,-ասաց Վարդանյանը։
Վարդանյանը երեք տարբերակ առաջարկեց Փաշինյանին։ «Կա՛մ դուք էլ գնացեք ապահով Բաքու, կա՛մ հաճելի մի այլ մայրաքաղաք, կա՛մ Վարդաշեն։ Բարեկամական կարճ խորհուրդ՝ հե-ռա-ցեք»։
Ելույթի նմանվող խորհրդին Փաշինյանը պատասխանեց․
«Վերջում լավ վանկարկեցիք, բայց տպավորություն չգործեց, հաջորդ հարցուպատասխանի ժամանակ, եթե ամբողջ խմբակցությունով միաձայն փորձեք՝ հե-ռա-ցեք, գուցե քաղաքական ազդեցություն կունենա երկրի քաղաքական իրավիճակի վրա։ Տեսեք, դուք դրոշներ եք դրել ձեր սեղանին, ամբողջ օրը առավոտից իրիկուն խոսում եք ԼՂ-ի մասին, Արցախի մասին, բայց ձեր խոսույթի մեջ նույնիսկ հարգանք չկա, հասկանո՞ւմ եք։ Ասում եք՝ ձեր խոսակից Արայիկը, այսինքն, մարդու էսօրվա վիճակը, նախկին կարգավիճակը և ձեր ճառերը ցույց են տալիս, որ հարգանքի պրիմիտիվ արտահայտություն չունեք։ Էդ դրոշը իրիկունը փաբում նյութական միջոց ապահովելու բան ա։ Ասում եք՝ գնացեք Վարդաշեն, չգիտեմ ինչ, դուք էլ հայտարարում եք Վարդաշեն, մեկ Իտալիայում եք, մեկ Հոլանդիայում եք, ինչքան ռեզորթ կա Եվրոպայում ու Ասիայում բաց չեք թողնում։ Էդ մահապարտությունը բա՞ն ա ըտեղ, գտա՞ք մահապարտ, հա՞, եվրոպական 5 աստղանի ռեզորթներում քանի՞ մահապարտ գտաք վերջը, տենց էլ չհասկացանք։ Ընդդիմադիր քաղաքական գործիչները, ոչինչ, կարող են շատ բան ասել, մինչև որոշակի սահման հանդուրժող ենք, բայց երբ որ սահմանը անցավ՝ ում պետք ա ուղարկել Վարդաշեն, կուղարկենք Վարդաշեն, ում պետք չի ուղարկել Վարդաշեն, կուղարկենք ոչ Վարդաշեն: Իսկ ինչ վերաբերվում ա Բաքու գնալ-գալու տրամադրությանը, ենթադրում եմ, որ էդքան վստահ ասում եք, գնալ-գալու ձևերը, ուղիները, կապուղիները դուք լավ գիտեք, այդ թվում ձեր քաղաքական ուժի ղեկավարի բազմամյա փորձի բերումով՝ Բաքու գնալ-գալու, մտնելու-դուրս գալու, տալու-առնելու և այլն և էդպես շարունակ»,-ասաց Փաշինյանը։
Վարդանյանը նշեց, որ այլ բան չէր սպասում Փաշինյանից։
«Անձնական դաշտ մտնել, երջանիկ եղեք, որ ես անձնական դաշտ չեմ մտնում, ինձ թույլ չեմ տալիս, բայց որ դուք կարող եք լինել բանսարկու, զրպարտիչ, նորություն չի»։
Փաշինյանն էլ արձագանքեց․ «Գիտեք, ինչի եք էսքանով ասում հե-ռա-ցեք, որովհետև Հանրապետության հրապարակում էսքանով էիք մնացել, որ գոռում էիք հե-ռա-ցեք»։
Փաշինյանի ելույթը ընդդիմության մոտ իրարանցում ստեղծեց, ամբիոն-դահլիճ փոխադարձ մեղադրանքներից հետո վարչապետն ասաց․
«Եռաբլուրի վրա Լեքսուզ ու Տոյոտաներ սարքողներ, եկել ինչից եք խոսում, ու էդ բան փորը տնկած եկել մեծ-մեծ ինչ եք խոսում, ո՞վ ես վապշե»։
Մանրամասները՝ տեսանյութում