Ադրբեջանի արտգործնախարարը դիմել է ՄԱԿ-ի գլխավոր քարտուղարին՝ խնդրելով օգնել Հայաստանից երկու ադրբեջանցի սահմանախախտների վերադարձի հարցում։
«Հայաստանի կողմից կեղծած հայցը՝ գերի ընկած ադրբեջանցի զինվորների դեմ , միջազգային մարդասիրական իրավունքի կոպիտ խախտում է»,- ասվում է Բայրամովի` Գուտերեշին ուղղված նամակում։
Մինչդեռ, մատնանշենք, Ադրբեջանն ինչպես միշտ աղավաղում է բոլոր փաստերը, և ՀՀ սահմանը խախտած ադրբեջանցի զինծառայողները որևէ կերպ գերի ձևակերպման տակ չեն ընկնում: Նրանցից մեկը ՀՀ-ում մեղադրվում է Զանգեզուրի պղնձամոլիբդենային կոմբինատի պահնորդ 56-ամյա Հայրապետ Մելիքսեթյանի պանության համար:
Հիշեցնենք, որ ապրիլի 10-ին՝ ժամը 01:00-02:00-ն ընկած ժամանակահատվածում, ՀՀ տարածքում հայտնաբերվել և ձերբակալվել էր Ադրբեջանի ԶՈՒ զինծառայող: Երեք օր անց՝ ապրիլի 13-ին, ՀՀ տարածքում հայտնաբերվել և ձերբակալվել էր ադրբեջանցի երկրորդ զինծառայողը, փոխանցվել՝ ԱԱԾ-ին:
ՀՀ գլխավոր դատախազությունն ավելի ուշ հայտնել էր, որ ապիլի 12-ին ԶՊՄԿ-ի պահնորդին, ըստ ստացված ապացույցների, սպանել է ՀՀ ներթափանցած ադրբեջանցիներից մեկը: Ադրբեջանցի զինծառայողները կալանավորվել են, նրանցից մեկի՝ Ագշին Բաբիրովի գործով դատավճիռ է կայացվել։
Ավել վաղ Մարդու իրավունքների եվրոպական դատարանը մերժել է ՀՀ սահմանը ապօրինաբար հատած Ադրբեջանի երկու քաղաքացիների իրավունքների պաշտպանության համար վերջիններիս հարազատների կողմից ՀՀ կառավարության դեմ Եվրոպական դատարանի կանոնների 39-րդ կանոնով սահմանված միջանկյալ միջոց կիրառելու մասին պահանջը։ Մասնավորապես, Եվրոպական դատարանից պահանջվել էր կիրառել միջանկյալ միջոց այն հիմնավորմամբ, որ ՀՀ-ում ադրբեջանցի երկու զինծառայողների նկատմամբ դրսևորվում է կյանքի իրավունքին և խոշտանգումներից զերծ մնալու պարտավորությանը հակասող վերաբերմունք։ ՀՀ կառավարությունը Եվրոպական դատարան է ներկայացրել պատշաճ դիրքորոշում այն մասին, որ ադրբեջանցի զինծառայողների կոնվենցիոն իրավունքները պատշաճ երաշխավորվել են ՀՀ-ում։ Այս առնչությամբ ՀՀ կառավարությունը Եվրոպական դատարան է ներկայացրել նաև համապատասխան ապացույցներ։