Եկավ այդ օրը. Հայաստանի ղեկավարությունը պաշտոնապես ցավակցում է Թուրքիային:
Մասնավորապես, ՀՀ արտաքին գործերի նախարար Արարատ Միրզոյանն այսօր ցավակցել է թուրք գործընկերոջը.
«Անկեղծորեն ցավակցում եմ Բարտինում [Թուրքիայում] ածխահանքի պայթյունի հետևանքով բոլոր զոհվածների հարազատներին։ Արագ վերականգնում եմ մաղթում բոլոր վիրավորներին»,- Twitter-ի իր միկրոբլոգում գրել է Միրզոյանը` գրառման մեջ նշելով Մևլութ Չավուշօղլուին։
Մինչդեռ օգոստոսին "Սուրմալու” առևտրի կենտրոնում պայթյունից հետո, որի հետևանքով 16 մարդ զոհվեց, Թուրքիայի ԱԳ նախարարը, չգիտես ինչու, չցավակցեց Միրզոյանին... թեև իրականում պարզ է՝ ինչու՝ թուրքը երբեք չի ցավակցի հային վրա հասած դժբախտության համար, քանի որ մեր դժբախտությունները Թուրքիային ու Ադրբեջանին մշտապես ուրախություն են պատճառում: Էլ չասենք, որ դրանց մեծամասնության հեղինակը հենց իրենք են:
Հետևապես ինչո՞ւ է շտապում Արարատ Միրզոյանը: Քանի դեռ այսպես կոչված (չ)խաղաղության դարաշրջանը իրականություն չի դարձել, քանի դեռ դիվանագիտական հարաբերությունները 30 տարի առաջ խզած Անկարան դրանք չի վերականգնել, ի՞նչ կարիք կա թշնամուդ ցավակցության խոսքեր հայտնելու և ըստ այդմ էլ ավելի բորբոքելու հանրությունդ, որն այս օրերին բռնել է դեպի գերեզմանատներ ճանապարհը՝ 44-օրյա պատերազմի զոհերի մահվան երկրորդ տարելիցն է:
