Սաստիկ ձմռանը Ֆինլանդիան կարող է խղճուկ վայր դառնալ: Ջերմաստիճանը հաճախ իջնում է -20°C-ից ցածր, իսկ տարվա ամենամութ ամիսներին Հելսինկիում օրական վեց ժամից պակաս է լույս լինում:
Տարերքների դեմ պայքարելու համար Ֆինլանդիան դարձել է ԵՄ-ի ամենաէներգատար տնտեսությունը: Բայց քանի որ մոտենում է ձմեռը, երկիրը պատրաստվում է էլեկտրաէներգիայի հովհարային անջատման: Չնայած ռուսական էներգիան Ֆինլանդիայի ընդհանուր մատակարարման միայն փոքր մասն է կազմում, դրա կորուստը հսկայական հետեւանքներ կարող է ունենալ, եւ ֆինները ստիպված են ընտրություն կատարել վատ տարբերակների միջեւ:
Առանց անջատումների երկրում լայնածավալ խափանում կլինի, եւ «մարդիկ կարող են մահանալ», կարծում է Fingrid Oyj-ի ցանցային գործառնությունների մենեջեր Արտո Պահկինը:
Ֆինլանդիան եվրոպական էներգետիկ ճգնաժամի առաջնագծում է։ Մայիսին Ռուսաստանը դադարեցրել է երկրին էլեկտրաէներգիայի եւ գազի վաճառքը։ Քանի դեռ տարածաշրջանի երկրները պատրաստվում են ծանր ձմռանը, Ֆինլանդիան հատկապես վտանգի տակ է, քանի որ էներգիայի կորուստը կարող են ժամերով բնակիչներին սպառնալի պայմաններում դնել:
Միեւնույն ժամանակ, թերեւս ոչ մի երկիր ավելի լավ պատրաստված չէ էլեկտրաէներգիայի անջատման հետեւանքներին: Տարիներ շարունակ պաշտպանության նախարարությունը բուկլետներ է հրապարակել այն մասին, թե ինչ անել հոսանքազրկման դեպքում՝ խորհուրդ տալով մարդկանց տանը պահել մարտկոցով աշխատող ռադիոկայաններ, ինչպես նաեւ բավարար քանակությամբ սնունդ, ջուր եւ դեղամիջոցներ՝ 72 ժամ դիմանալու համար: Նույնիսկ ուկրաինական պատերազմից առաջ Ֆինլանդիայի քաղաքացիների մոտ մեկ երրորդը ձեռքի տակ ունեցել է այդ պաշարները։
Այն, ինչ հիմա կատարվում է, բազմամյա պլանավորման գագաթնակետն է։ 2014 թվականի սեպտեմբերին իշխանությունները արկտիկական Ռովանիեմի քաղաքում հոսանքազրկել են 70 000 մարդու, որպեսզի տեսնեն, թե ինչպես կազդի էլեկտրաէներգիայի հանկարծակի լայնածավալ անջատումը իրական կյանքի վրա:
Թեեւ Ֆինլանդիայում 1974 թվականից ազգային ցանցի խափանման պատճառով էլեկտրաէներգիայի անջատում չի եղել, սպառնալիքը մնում է, եթե ներմուծումն ապահովված չլինի: Ի տարբերություն հարեւան Շվեդիայի եւ Նորվեգիայի, որոնք ունեն հիդրոէներգիայի առատ պաշարներ, Ֆինլանդիան ունի սակավ ներքին էներգետիկ ռեսուրսներ, իր գրեթե ողջ հանածո էներգիան գնում է եւ ապավինում է ներմուծմանը, որպեսզի լրացնի դեֆիցիտը: Սակայն, որոշակի թեթեւացում կարող է գալ մոտակա մի քանի ամիսների ընթացքում, երբ սկանդինավյան փոքր երկիրը մոտ 14 տարվա ուշացումից հետո վերջապես կանոնավոր շահագործման կհանձնի Եվրոպայի ամենամեծ միջուկային ռեակտորը:
Սակայն ֆինները կուտակում են փայտի, գազի վառարանների ու դիզելային գեներատորների պաշարներ եւ նախաձեռնությունը վերցնում են իրենց ձեռքը՝ կրճատելով էլեկտրաէներգիայի սպառումը: Ի հավելումն այն բանին, որ մարդկանց կոչ են անում իջեցնել տներում ջերմաստիճանը, ավելի քիչ ցնցուղ ընդունել եւ ավելի հաճախ օգտվել հասարակական տրանսպորտից, կառավարությունը սկսել է էներգախնայողության սեփական նախաձեռնությունները, այդ թվում՝ նվազեցնելով խորհրդարանի շենքի շոգեբաղնիքի բացման ժամերը: