Հոկտեմբերի 21-ին մայրաքաղաքի երթևեկությունը կաթվածահար է լինելու․ պատճառը մի շարք փողոցների փակ լինելն է։

Մի դեպքում դա արվում է «Կանաչապատում և շրջակա միջավայրի պահպանություն» ՀՈԱԿ-ի կողմից, իսկ մյուս դեպքում՝ Եվրասիական միջկառավարական խորհրդի նիստին մասնակցող վարչապետների հարմարավետության համար։

Հաղորդագրությունները ստորև․

1. «Կանաչապատում և շրջակա միջավայրի պահպանություն» ՀՈԱԿ-ից հայտնում են, որ մայրաքաղաքում մեկնարկած էտով պայմանավորված՝ հոկտեմբերի 21-ին՝ ժամը 08:30-17:00, փակ կլինի Կենտրոն վարչական շրջանի՝ Հանրապետության փողոցը՝ Թումանյան- Տպագրիչներ փողոցների երթեւեկելի մասը:

Ծանրաբեռնված կլինի Մաշտոցի պողոտան՝ Սայաթ-Նովա-Թումանյան հատվածում: Աջափնյակում դժվարանցանելի կլինի Հալաբյան փողոցից Հրազդանի կիրճ տանող ճանապարհը, Շենգավիթում՝ Շիրակի փողոցը:

2. Երևանում անցկացվող Եվրասիական միջկառավարական խորհրդի նիստի կապակցությամբ հոկտեմբերի 21-ին՝ ժամը 9-ից 11-ը, արարողակարգային միջոցառումներով պայմանավորված, ըստ անհրաժեշտության, կսահմանափակվեն տրանսպորտային միջոցների երթևեկությունը Մաշտոցի և Բաղրամյան պողոտաներում, Սարալանջի, Տերյան, Կորյունի, Ամիրյան, Պռոշյան և Գրիգոր Լուսավորչի փողոցներում։