Հայաստանը բարձր է գնահատում բարեկամ Իրանի սկզբունքային դիրքորոշումը՝ իր տարածքային ամբողջականության վերաբերյալ, ինչպես նաև տարածաշրջանում կայունության և խաղաղության հաստատմանն ուղղված իրանական ջանքերը: Իրանի ԱԳ նախարար Հոսեյն Ամիր Աբդոլլահիանի հետ համատեղ ասուլիսի ժամանակ հայտարարել է ՀՀ ԱԳ նախարար Արարատ Միրզոյանը:
Նա նշեց, որ վաղը Կապանում տեղի կունենա Իրանի գլխավոր հյուպատոսության բացման արարողությունը, որին կմասնակցեն նաև Հայաստանի և Իրանի արտգործնախարարները:
«Սա նշանակալի և խորհրդանշական քայլ է, որը վկայում է երկու երկրների և բարեկամ ժողովուրդների միջև համագործակցությունը որակական նոր մակարդակի հասցնելու պատրաստակամության մասին:
Վստահ եմ, որ Իրանի գլխավոր հյուպատոսությունն իր ներդրումը կունենա Սյունիքում առևտրատնեսական, էներգետիկ և գիտամշակութային ոլորտների զարգացման գործում»,-ասաց Միրզոյանը: