Իսրայելի պաշտպանության նախարար Բենի Գանցն իր ուկրաինացի գործընկեր Ալեքսեյ Ռեզնիկովի հետ քննարկել է օդային սպառնալիքների մոտենալու համար Կիեւին վաղաժամ նախազգուշացման համակարգ տրամադրելու իսրայելական առաջարկը։
Իսրայելի պաշտպանության նախարարությունը զրույցը գնահատել է որպես «դրական»։
Նախարարները հեռախոսազրույց են ունեցել այն բանից հետո, երբ անցյալ շաբաթ Իսրայելում Ուկրաինայի դեսպան Եվգենի Կորնիյչուկը եբրայալեզու լրատվամիջոցներին ասել էր, որ Հանցն անսպասելիորեն չեղարկել է երկար սպասված հեռախոսազրույցը Ռեզնիկովի հետ, ինչը «հիասթափություն» է առաջացրել Կիեւում:
Հանցի գրասենյակից հայտնել են, որ Ռեզնիկովը նրան ներկայացրել է Ուկրաինայի ռազմադաշտում վերջին զարգացումները: Գանցը «ցավակցություն է հայտնել մարդկային ողբերգական կորստի եւ պատերազմի հետեւանքով առաջացած հումանիտար ճգնաժամի կապակցությամբ»։
Նախարարը հաստատել է Իսրայելի հավատարմությունը ուկրաինացի ժողովրդին եւ աջակցությունը Ուկրաինային հումանիտար օգնության եւ փրկարարական սարքավորումների մատակարարման միջոցով, ինչպես նաեւ ընդգծել է Իսրայելի «օպերացիոն սահմանափակումները»՝ կապված Սիրիայում Ռուսաստանի ներկայության հետ։ «Արդյունքում Իսրայելը Ուկրաինային սպառազինության համակարգեր չի մատակարարի»,- ասել է Գանցը Ռեզնիկովին։
Կողմերը պայմանավորվել են մասնագիտական երկխոսություն վարել քաղաքացիական վաղ ահազանգման համակարգի վերաբերյալ։ Գանցն ու Ռեզնիկովը պայմանավորվել են առաջիկա շաբաթների ընթացքում պահպանել հաղորդակցության բաց գիծը՝ օրակարգի լրացուցիչ հարցեր քննարկելու համար։
Իսրայելը Ուկրաինային ռազմական օգնություն չցուցաբերելու խիստ քաղաքականություն է վարում։ Այս որոշման պատճառը, ըստ երեւույթին, գործողությունների ազատությունը պահպանելու Իսրայելի ռազմավարական կարիքն է: Դրա համար անհրաժեշտ է համագործակցություն ռուս զինվորականների հետ, որոնք հիմնականում վերահսկում են Սիրիայի օդային տարածքը, գրում է Times of Israel-ը։