«Աննայի մտերիմներն ինձ փոխանցեցին, որ նա տալու է իր տեքստի մեկնաբանությունը: Նույն Աննա կոչեցյալը իր օգնականներին ասել է՝ «եթե Վիգենը չպատասխաներ, գուցե ջնջեի»։ Մեղմ ասած՝ ինձ պրինցիպ է ընկել»,- MediaHub-ի հետ զրույցում ասաց արցախյան 44-օրյա պատերազմի ժամանակ զոհված Արման Ազատյանի հայրը՝ Վիգեն Ազատյանը, որը Նիկոլ Փաշինյանի տիկին Աննա Հակոբյանին ժամանակ էր տվել իր ընտանիքի լուսանկարով գրառումը հեռացնելու համար։
Երեք օր առաջ արված ֆեյսբուքյան գրառման մեջ Աննա Հակոբյանը անդրադարձել էր զոհված տղաներին, նշելով, որ «մենք պետք է մեր սուգը թաղենք այնպես, ինչպես մայրն է թաղել իր 19-ամյա զինվորին» եւ դրան կից տեղադրել էր Ազատյանների ընտանիքի լուսանկարը։
Գրառումը դեռ Աննա Հակոբյանի էջում է։ Վիգեն Ազատյանի խոսքով՝ Փաշինյանի տիկոջ՝ զոհվածների ծնողների նկատմամբ այս քայլերը հատուկ նպատակ ունեն՝ ամեն գնով խաթարել ծնողների հանգիստը։
«Այդպես էլ եղավ. մենք հիմա ամեն ինչ դրել ենք մի կողմ, ընկել ենք էդ գրառման հետեւից։ Նա մեզ միտումնավոր շեղեց բավականին լուրջ գործողություններից, որոնք կապված էին Արցախի հետ։ Մենք պատրաստվում էինք գնալ Արցախ։ Այս պահին շատ կարեւոր է ծնողների համախմբումը, որ մեր ձայնը տեղ հասնի», -ասաց նա։
Վիգեն Ազատյանի ընտանիքի նկարը Աննա Հակոբյանի մոտ հայտնվել է համացանցից, այդպես է կարծում զոհվածի հայրը։ Փաշինյանի տիկնոջ մտերիմներից հետաքրքրվել է՝ ինչո՞ւ հենց իր ընտանիքը։
«Ես իր մտերիմներին հարցրել եմ՝ ինչո՞ւ ես, ինչո՞ւ իմ ընտանիքի նկարը, պատասխանը՝ «շատ լավ, ստացված նկար ա Եռաբլուրում, մեկ նկարում՝ զոհված եւ նորածին տղաները միասին», ծիծաղելով պատասխանում էին։ Ես այդ գրառումը այսպես եմ հասկացել՝ մեռելներին պետք է թաղել, նոր ծնունդներ ունենալ ու այդ ամենի ֆոնին իմ մեծ եւ փոքր տղաներն են։ Աննան չի ջնջել այդ գրառումը, բայց ես իմ ասածի տերն եմ»,-հավելեց նա։
Լիա Սարգսյան