Իրանի արդյունաբերության, առեւտրի եւ հանքերի նախարար Ռեզա Ֆաթեմի Ամինը հայտարարել է օդային եւ ծովային արդյունաբերության ոլորտում Ռուսաստանի հետ համագործակցության ընդլայնման մասին, հայտնում է ԻՌՆԱ-ն։
«Ռուս պաշտոնյաների հետ հանդիպման ժամանակ մենք պայմանավորվածություն ձեռք բերեցինք օդային արդյունաբերության ոլորտում։ Քայլեր ձեռնարկվեցին նաեւ նավաշինության ոլորտում»,- ասել է իրանցի նախարարը Մոսկվայի ավտոմոբիլների եւ պահեստամասերի «Ավտոմեխանիկա» ցուցահանդեսում (MIMS Automobility Moscow) երկրի ավտոարտադրողների ներկայացուցիչների հետ հանդիպմանը։
Նա նշել է, որ Իրանն այժմ ձգտում է Ռուսաստանի հետ տնտեսական հարաբերությունների թռիչքի։
Առեւտրի նախարարը խոսել է երկու երկրների միջեւ առեւտրային հարաբերություններում առկա խնդիրների լուծման ուղղությամբ Իրանի կենտրոնական բանկի եւ էկոնոմիկայի նախարարության ջանքերի մասին։
Մատնանշելով երկու ամիս առաջ Իրանի մաքսային ծառայության ղեկավարի այցը Ռուսաստան՝ Ֆաթեմի Ամինը խոստացել է, որ Թեհրանի եւ Մոսկվայի միջեւ մաքսային խնդիրները շուտով կլուծվեն։
Նրա խոսքով՝ Իրանը լրջորեն հետեւում է ԵԱՏՄ-ի միջեւ ազատ առեւտրի համաձայնագրին։