Տնտեսական հարցերով Ուկրաինայի նախագահի խորհրդական Օլեգ Ուստենկոն ասել է, որ Ուկրաինան ութից ինը ամսում կարող էր 60 մլն տոննա հացահատիկ արտահանել, եթե նավահանգիստները չարգելափակվեին, սակայն Ռուսաստանի հարվածը Օդեսայի նավահանգստին ցույց է տվել, որ դա այնքան էլ հեշտ չի լինի, հաղորդում է Reuters լրատվական գործակալությունը։

Նա նշել է, որ Ուկրաինան կարող է 9,7 միլիարդ եվրո վաստակել՝ վաճառելով 20 միլիոն տոննա հացահատիկ սիլոսներից եւ 40 մլն տոննա նոր բերքից եւ հավելել,ո ր 60 միլիոն տոննա բերքի 20 միլիոնը նախատեսված է ներքին սպառման համար:

«Եթե նավահանգիստներն այժմ ապաշրջափակված լինեին, եւ նրանք ասեին, որ մենք պետք է տեղափոխենք 60 միլիոն տոննա հացահատիկ, ապա ութից ինը ամսվա ընթացքում կփոխադրեինք այն: Սակայն, հաշվի առնելով, թե ինչ է անում Ռուսաստանը Սեւ ծովում, երեկվա հարվածը ցույց է տալիս, որ այս մեխանիզմը չի աշխատի»,- շեշտել է Ուստենկոն եւ հավելել, որ ներկայիս արագությամբ իրենցից 20-ից 24 ամիս կպահանջվի`հացահատիկի արտահանման համար: