Մենք ներկայացնում ենք իրավիճակը միջազգային կառույցներին՝ ակնկալելով իրենց աջակցությունը։ Այդ մասին այսօր Արցախի շուրջ ստեղծված վիճակի մասին քննարկման ժամանակ ասաց Արցախի նախկին պետնախարար Ռուբեն Վարդանյանը։

Նրա խոսքով՝ իրենք ստեղծված վիճակը՝ սննդի, գազի, էլեկտրաէներգիայի հետ կապված, կարողանում են ներկայացնել, բայց չի ստացվում ցույց տալ այն մակարդակով, որ պարզ դառնա, թե ամեն օր ինչ է կատարվում Արցախում, ինչ կորուստներ կան ընդհանրապես։

«Մենք ուզում ենք ասել, որ պետք է ավելի խորքային ներկայացվի վիճակը, որ միջազգային հանրությունն էլ դա ավելի խորքային ընկալի։ Գումարները շատ մեծ են։ Մոտ 60 միլիարդ այս տարի ՀՀ բանկերին պիտի վճարենք, բայց այդքան գումար հիմա Արցախի տնտեսությունը չունի։ Մենք բյուջետային դեֆիցիտ ունենք, ֆինանսական ճգնաժամն էլ շատ սուր է»,- ասաց նա։

Ռուբեն Վարդանյանը նկատեց՝ ամենօրյա ծախսերը հոգալով խորքային հարցերը չեն լուծվելու, ու տնտեսությունն էլ չի աշխատում շրջափակման հետևանքով։

«Մենք ահավոր ծախսերի աճ ունենք, հայց հումք չենք կարողանում ներմուծել, տնտեսությունը ո՞նց զարգացնենք։ Ունենք իրավիճակ, որը շատ բարդ է։ Շատ քիչ են օրինակները, երբ 120 հազար մարդ շրջափակման մեջ է 100 օրից ավելի։ Ու ելքեր գտնելն էլ բարդ է։ Շատ լուրջ հարցեր կան, որոնք բավարար չափով չեն քննարկվում»,- ասաց Վարդանյանը։

Նա նաև նկատեց՝ պաշտոնյաների հետ կապ ունեցողներն այս վիճակում փող են աշխատում։

MediaHub-ը հիշեցնում է, որ մամուլն այսօր գրել էր այս խնդրի մասին: Մասնավորապես այն, որ Արցախի Անվտանգության խորհրդի նախկին քարտուղար Սամվել Բաբայանը, ով մոտ երկու ամիս է՝ տեղափոխվել է Արցախ, փորձում է ձեռքը վերցնել մսի շուկան։

«Բլոկադայի մեջ հայտնված Արցախում խնդիրներ են առաջացել բոլոր, այդ թվում՝ ներկրման ոլորտում։ Մինչեւ բլոկադան մսի ներկրմամբ զբաղվել է 2020 թվականի պատերազմում զոհված հերոսներից մեկի եղբայրը, որը շահել է կառավարության տենդերը։ Մեր աղբյուրներն ասում են, որ Արցախ տեղափոխվելուց հետո Բաբայանը, օգտագործելով հայաստանյան իր կապերը, որոշել է անձամբ զբաղվել Արցախ մսի ներկրմամբ, եւ անգամ նախկին ներկրողի հետ ընդհարում է եղել: Ի վերջո, որպեսզի մեծ աղմուկ չբարձրանա, կոմպրոմիսի են եկել՝ ներկրում է Բաբայանի ընտանիքը, իսկ Արցախում իրացնում է նախկին ներկրողը»,- գրել էր «Հրապարակ»-ը։

Մանրամասները՝ տեսանյութում։