Արդեն մեկ օր է, ինչ Արցախը Հայաստանի ու արտաքին աշխարհի հետ կապող միակ ճանապարհը փակ է: Իրավիճակը շարունակում է լարված մնալ, ու հայտնի չէ, թե դեռ ինչքան:
Քիչ առաջ Արցախի Ազգային ժողովը հայտարարություն ընդունեց, որում, ի թիվս այլի, կոչ է անում ՀՀ իշխանություններին՝ ձեռնարկել գործուն քայլեր:
«Հայաստանի Հանրապետության իշխանությունները պարտավոր են ձեռնարկել առարկայական և գործուն քայլեր` Արցախի Հանրապետության և Հայաստանի Հանրապետության միջև անխափան ցամաքային կապի վերականգման և Արցախի Հանրապետության քաղաքացիների իրավունքների պաշտպանության նպատակով»,- ասված է հայտարարության մեջ:
Ի՞նչ սպասել ՀՀ իշխանություններից: Երեկվանից Հայաստանի Հանրապետության Արտաքին գործերի նախարարությունը որևէ կերպ չի արձագանքել իրավիճակին, որը այլ կերպ, քան հումանիտար աղետ, չես անվանի: Ի դեպ, Ստեփանակերտի Բժշկական կենտրոնի տնօրինությունն այսօր արդեն հայտարարել է, որ կան հիվանդներ, որոնց կյանքը մազից է կախված, քանի որ նրանց հարկավոր է տեղափոխել Հայաստան...
Լռում են նաև ՀՀ վարչապետի և նախագահի պաշտոնները զբաղեցրած անձինք:
MediaHub-ը դիմեց Հայաստանի Ազգային ժողովին՝ հասկանալու, գուցե պատգամավորնե՞րն են ինչ-որ բան նախաձեռնել՝ համատեղ հայտարարության տեքստ, արտահերթ նիստ կամ էլ, ասել ասողի, թեյախմություն, որի շուրջ կքննարկեն ստեղծված իրավիճակը: Սակայն պարզվեց, որ Հայաստանի խորհրդարանի պատգամավորներին Արցախի ճակատագիրը հետաքրքրում է միայն Ֆեյսբուքյան հարթակում ստատուս գրելու մակարդակում՝ այլ գործողություն ո՛չ ընդդիմությունը, ո՛չ էլ, առավել ևս, իշխանությունը, չի նախաձեռնել.
«Այս պահին հայտարարության նախագիծ չկա»,- համատեղ հայտարարության տեքստի մասին մեր հարցին ի պատասխան ասաց ԱԺ նախագահ Ալեն Սիմոնյանի խոսնակ Ծովինար Խաչատրյանը:
Ի դեպ, MediaHub-ը ԱԺ խմբակցություններից փորձեց ճշտել, թե արդյոք նրանք պատրաստվում են երեսփոխաններ գործուղել մայրուղու այն հատված, որը երեկվանից փակ է և որտեղ մարդկանց ու ավտոմեքենաների խոշոր կուտակումներ կան: Սակայն պարզվեց, որ այս հարցի շուրջ մեր դրական սպասումները ևս սին են...