Քննչական կոմիտեն ակտիվ լծվել է Հանրապետական կուսակցության փոխնախագահ Արմեն Աշոտյանին ձերբակալելու գործը գլուխ բերելուն:
Իրավապահ համակարգում MediaHub-ի աղբյուրը հայտնում է, որ վերջին օրերին բազմաթիվ քաղաքացիներ կանչվել են հարցաքննության, նույնիսկ կան բերման ենթարկվածներ, ամեն հնարավորն արվում է, որպեսզի ցանկալի ցուցմունքներն ունենան ընդդիմադիր գործչի դեմ:
Նպատակն այն է, որ օր առաջ Աշոտյանը ձերբակալվի:
«Այս պահին քննարկվում է մի տարբերակ՝ Արմեն Աշոտյանին բերման ենթարկեն վաղը Արցախից վերադառնալիս, որպեսզի ավելի ցավոտ ու, ինչու չէ, խորհրդանշական լինի»,- ասաց մեր զրուցակիցը:
Նա, սակայն, հավելեց, որ իր ունեցած տեղեկություններով՝ Աշոտյանի դեմ ցուցմունք տվող մինչ այս պահը չի եղել և իրավապահները խնդրի առաջ են կանգնել:
Նշենք, որ Աշոտյանը Արցախում է՝ այսօր ՀՀ երրորդ նախագահ Սերժ Սարգսյանի մայրիկի մահվան առաջին տարելիցն է:
MediaHub-ը հիշեցնում է, որ շաբաթ օրը Միասնության հանրահավաքից հետո Արմեն Աշոտյանը ՖԲ ուղիղ եթերում հայտարարեց, որ իշխանությունները ՀՀ Քննչական կոմիտեի նախագահ Արգիշտի Քյարամյանի ձեռքով որոշել են նորից անդրադառնալ չորս տարվա վաղեմության մի գործի, որի շրջանակներում տարբեր մարդկանց են հարցաքննել, սակայն ապարդյուն: Վերջինս շեշտեց՝ Քյարամյանը Նիկոլ Փաշինյանի ուղիղ հրահանգով է հանձն առել այս գործը խելքի բերել:
«Մի քանի շաբաթ առաջ է այդ գործը փոխանցվել ՔԿ-ին, տխրահռչակ Քյարամյանին և Նիկոլ Փաշինյանը հանձնարարել է, վստահաբար եմ դա ասում, ամեն կերպ կալանավորել ինձ»,- ասաց Աշոտյանը: