Միացյալ Նահանգների պետական քարտուղար Էնթոնի Բլինքենը հեռախոսազրույց է ունեցել Թուրքիայի ԱԳ նախարար Հաքան Ֆիդանի հետ:
Թուրքիայի արտաքին գործերի նախարարության աղբյուրներից ստացված տեղեկատվության համաձայն՝ Ֆիդանը պետքարտուղարին ասել է, որ Թուրքիան դեմ է ցանկացած գործողությունների, որոնք կարող են մեծացնել անկայունությունը, ու որ երբեք թույլ չի տա ահաբեկչական գործողություններ սիրիացի խաղաղ բնակչության դեմ, հայտնել են թուրքական ԶԼՄ-ները։
Հեռախոսազրույցի ընթացքում արտգործնախարարները քննարկել են Սիրիայում վերջին իրադարձությունները։ Ֆիդանը ընդգծել է, որ Թուրքիան դեմ է ցանկացած իրադարձությունների, որոնք կարող են մեծացնել անկայունությունը տարածաշրջանում, և այս համատեքստում Թուրքիան հանդես է գալիս Սիրիայում լարվածության նվազեցման օգտին։
Նա նշել է, որ Սիրիայում խաղաղություն ու հանգստություն հաստատելու համար պետք է ավարտին հասցվի վարչակարգի և ընդդիմության միջև քաղաքական գործընթացը։
Նախարարը հավելել է, որ Լիբանանում մշտական հրադադարի համար Իսրայելը պետք է կատարի իր պարտավորությունները։ Նրա խոսքով՝ Գազայում պետք է հնարավորինս շուտ հրադադար հաստատվի, իսկ տարածաշրջան պետք է հասցվի մարդասիրական օգնություն։
Զրույցի ընթացքում քննարկվել են նաև Ուկրաինային և Հարավային Կովկասին վերաբերող հարցեր։