Քիչ առաջ ՀԾԿՀ նախագահի միանձնյա որոշմամբ ՊՎԾ ղեկավարի պաշտոնից երեկ ազատված Ռոմանոս Պետրոսյանը նշանակվեց ՀԷՑ ժամանակավոր կառավարիչ։
Հիշեցնենք, որ դեռ այսօր առավոտյան էր MediaHub-ը գրել, որ հնարավոր է՝ ՀԾԿՀ-ն ՏԿԵ նախարարությունից հաղորդում է ստացել ՀԷՑ-ի դեմ վարույթ հարցելու համար, և հնարավոր է՝ հենց այսօր էլ ՀԾԿՀ նախագահը, ԱԺ-ում ընդունված վերջին օրենսդրական փոփոխություններից հետո ձեռք բերած լիազորությամբ, միանձնյա որոշում կայացնի վարույթ հարուցել ՀԷՑ-ի դեմ և նոր կառավարիչ նշանակել։ Դրա համար ՀԾԿՀ-ն ուներ հնգօրյա ժամկետ, որը լրանում էր երկուշաբթի, սակայն մեզ ասացին՝ հնարավոր է, որ հենց այսօր էլ այդ որոշումը կայացվի։ Փաստորեն, իշխանություններն այն աստիճանի են շտապում ՀԷՑ-ը խլել «Տաշիր գրուպից», որ Ռոմանոսին դեռ երեկ ազատած՝ այսօր ափալ-թափալ նշանակեցին ՀԷՑ ժամանակավոր կառավարիչ։ Ի դեպ, Ռոմանոս Պետրոսյանը որևէ համապատասխան գիտելիք կամ կրթություն չունի, էներգետիկ համակարգից չի հասկանում, ոչ էլ իրավաբան է, ընդամենը ավարտել է ԵՊՀ աշխարհագրության և երկրաբանության ֆակուլտետը՝ «Օգտակար հանածոների հանքավայրերի հետախուզում և գնահատում» մասնագիտությամբ։ Բայց այսպիսի գիտելիքներով հասցրել է աշխատել Կոտայքի մարզպետ, ապա շրջակա միջավայրի նախարար, հետո էլ՝ ՊՎԾ պետ, հիմա էլ ՀԷՑ-ն է կառավարելու։
Ի դեպ, ՀԾԿՀ-ն դեռ պետք է պաշտոնապես ծանուցի մամուլի միջոցով իրենց ճակատագրին հետևող ՀԷՑ-ին և «աչքալուսանք տա», որ նոր կառավարիչ ունեն, որից հետո նոր որոշումը ուժի մեջ կմտնի։ Այսինքն՝ երկուշաբթի օրվանից կարող են ՀԷՑ-ում փուչիկներով և ծաղիկներով դիմավորել Ռոմանոս Պետրոսյանին։
Վահե Մակարյան