Երևանի Ավան վարչական շրջանի Աճառյան փողոցում մեկ շաբաթից ավելի է՝ հսկայական փոս է գոյացել ճանապարհի հենց մեջտեղում։ Բայց սա զուտ փոսալցման ենթակա փոս չէ, ինչ-որ ուրիշ բան է, քանի որ խորը անցք է բացվել, և հատակը երևում է։ Ու մեկ շաբաթ է՝ ո՛չ Ավանի թաղապետարանը, ո՛չ Երևանի քաղաքապետարանը այս փոսի հարցը չեն կարողանում լուծել։
Միակ մխիթարող հանգամանքն այն է, որ Երևանում սկսել են տեղ-տեղ արդեն փոսերի մոտ նորմալ կահավորված նախազգուշացնող նշաններ տեղադրել՝ ծառ տնկելու կամ անվադողով փոսը ծածկելու փոխարեն։ Դա արդեն լուրջ առաջընթաց է 21-րդ դարում ավելի քան 2800-ամյա մայրաքաղաքի համար։ Բայց դեռ այնքան չենք զարգացել, որ մի հասարակ փոսը գոնե մեկ շաբաթում սարքենք։
MediaHub-ն այսօր դիմեց Երևանի քաղաքապետարան՝ ճշտելու, թե ո՞ւմ պատասխանատվության տիրույթում է այդ փոսը և ե՞րբ է, ի վերջո, այն սարքվելու։ Քաղաքապետի մամուլի քարտուղար Հայկ Կոստանյանն ասաց, որ խնդիրը «Վեոլիա ջրի» տիրույթում է․
«Էդտեղ «Վեոլիա ջրի» խնդիրն է, «Վեոլիան» էդտեղ դիտահորի տակ անցնող հեղեղատար համակարգ ունի, դրա փլուզումն է եղել, ամբողջությամբ իրենց տիրույթում գտնվող հարց է, իրենք պետք է էդ մասը ամբողջությամբ քանդեն, այդ խնդիրները լուծեն, որ ասֆալտի այդ փոսը վերանա»։
Փաստորեն, էլի գցեցին «Վեոլիա ջրի» վրա։ Ինչու ենք ասում՝ էլի, որովհետև ինչ փոս կամ բաց դիտահոր լինում է, քաղաքապետարանից ասում են՝ «մենք կապ չունենք, «Վեոլիան» պետք է սարքի»։ «Վեոլիա ջրից» էլ հույս չկա, որ մի բան ժամանակին կսարքեն, քանի որ Հայաստանի ամենավատ աշխատող կառույցներից է, պարզապես մեր բարեկամ ֆրանսիացիներինն է՝ «դուխ չենք անում մի թթու խոսք ասել»։ Այ, որ ռուսական լիներ, հիմա Երևանի քաղաքապետարանը՝ քաղաքապետի գլխավորությամբ, երևի ամեն օր ակցիա անելիս կլիներ այդ ընկերության դիմաց։
Բայց այն, որ քաղաքը ու քաղաքում գտնվող ճանապարհները, այդ ճանապարհների վրա գոյացած փոսերը Երևանի քաղաքային իշխանության տիրապետության ու պատասխանատվության տակ են, և իրենք պարտավոր են բոլոր պատասխանատուներին, այդ թվում՝ «Վեոլիա ջրին» պարտադրեն, որ իրենց տիրույթում գտնվող խնդիրները ժամանակին լուծեն, դա Երևանի քաղաքապետարանում հաշվի չեն առնում։
Վահե Մակարյան