Ադրբեջանական վերահսկողության տակ անցած Լաչինի միջանցքով անցնող քաղաքացիների անվտանգությունն ապահովելու են Արցախի ոստիկանությունն ու ԱԻՆ-ը։ Այդ մասին MediaHub.am-ի հարցին ի պատասխան ասացին Արցախի ԱԱԾ-ից։
Դեռ 2020-ին, երբ ՀՀ տարածքով՝ Գորիս-Կապան ավտոճանապարհի 4 կմ-անոց հատված հանձնվեց թշնամուն, ՀՀ ԱԱԾ-ն հաղորդագրություն տարածեց՝ հորդորելով վարորդներին որքան հնարավոր է արագ անցնել ճանապարհի 4 կիլոմետրանոց հատվածը, որն, ըստ GPS համակարգի, գտնվում է Ադրբեջանի տարածքում։ Բացի այդ, ԱԱԾ-ն հեռախոսահամար էր տրամադրել, որպեսզի գերի ընկնելու դեպքում քաղաքացիները կարողանան զանգահարեն։
Քանի որ վերջին օրերին տեղի ունեցան ամոթալի զարգացումներ՝ Աղավնոն, Բերձորը և Ներքին Սուսը հանձնվեցին ադրբեջանական հսկողությանը, այս գյուղերը հայաթափվեցին, MediaHub-ը փորձեց պարզել, թե Լաչինի միջանցքով անցնող քաղաքացիներին արդյոք հեռախոսահամար տրամադրվելո՞ւ է, թե՝ ոչ, որպեսզի գերի ընկնելու կամ թշնամու կողմից սադրանքի ենթարկվելու դեպքում մարդիկ զանգահարեն։
Պարզվեց, սակայն, որ այս դեպքում միայն ոստիկանությունն ու ԱԻՆ-ն են զբաղվելու այս բավականին կարևոր հարցով, որն, անկասկած, հուզում է բոլորին՝ թե՛ արցախցիներին, թե՛ ՀՀ քաղաքացիներին։
«Լաչինի միջանցքի տարածքում ոստիկանությունը շուրջօրյա հսկողություն է իրականացնում, և պետք է ընդամենը զանգահարել 1.02, կամ՝ 911»,- եղավ Արցախի ԱԱԾ-ի պատասխանը։
Հարցին, թե արդյո՞ք այդ կերպ հնարավոր է արձագանքել քաղաքացիների ահազանգերին, արդյո՞ք մարդկանց անվտանգությունն այդ տարբերակով ապահովելն արդարացված է, միայն ստացվեց այն պատասխանը, թե դա է վիճակը, ոստիկանությունն է իրականացնելու հսկողություն։
«Հիմա էլ Արցախի ոստիկանությունը օրը երկու անգամ հաղորդագրություն է տարածում՝ տեղեկացնելով, որ ճանապարհը լրիվ անվտանգ է»,- հավելեցին Արցախի ԱԱԾ-ից։
Ինչ վերաբերում է ՀՀ ԱԱԾ-ին, ապա վերջինս այս հարցում ձկան պես լուռ է, դեռևս որևէ հաղորդագրություն չկա։ Թեև, կրկնենք, այս հարցն ուղղակիորեն նաև ՀՀ քաղաքացիների անվտանգությանն է վերաբերում:
Նարե Գնունի