Արդարադատության փոխնախարար Արմենուհի Հարությունյանը, որը 2000-ականներից տարբեր պաշտոններ է զբաղեցրել արդարադատության նախարարությունում և միայն 2022 թվականի մայիսին է Նիկոլ Փաշինյանի կողմից նշանակվել փոխնախարար, Mediahub-ի հետ զրույցի սկզբում դժվարացավ գնահատական տալ՝ առա՞ջ էր արդարադատության ոլորտում ավելի լավ վիճակ, թե՞ հիմա։

«Դուք փաստացի ոչ թե իմ գործունեությունից բխող հարց եք տալիս, այլ ուղղակի զուտ քաղաքացու կարծիք եք հարցնում, որը որ ի պաշտոնե ես իրավասություններ չունեմ գնահատականներ տալու»,-ասաց նա։

Փոխնախարարը նշեց, թե բոլոր իշխանություններն էլ ջանքեր գործադրել են, բայց վերջին տարիների ընթացքում իրականացված փոփոխությունները վկայում են այն մասին, որ թափանցիկությունը միանշանակ աճել է, ինչը միջազգային կազմակերպությունների գնահատականն է։ 

Նրան հիշեցրինք, որ մենք իրեն դիտարկում ենք ոչ թե որպես շարքային հպարտ քաղաքացի, այլ կառավարության և քաղաքական թիմի անդամ, ինչպես նաև երկար տարիներ այս ոլորտում աշխատող պաշտոնյայի, ինչին ի պատասխան՝ տիկին Հարությունյանն ասաց․ «Այս պահի դրությամբ ավելի լայն շրջանակ է, որ ես հիմա համակարգում եմ, և, բնականաբար, այն պատասխանը, որ ես տվեցի, չտվեցի որպես հպարտ քաղաքացի, այլ որպես կառավարության անդամ»։ 

Այնուհետև իրեն հպարտ քաղաքացի համարող փոխնախարարը, որպես արդարադատության ոլորտում գրանցած առաջընթացի գրավական, նշեց հետևյալը․ «Միայն այն հանգամանքը, որ այս ընթացքում կան իրավապաշտպան կազմակերություներ կամ անհատ իրավապաշտպաններ, որոնք կարողանում են իրենց կարծիքն ազատորեն արտահայտել, արդեն իսկ ցույց է տալիս այն հանգամանքը, որ իրենք այդ հնարավորությունից զրկված չեն։ Կան երկրներ, որոնք չունեն այդ հնարավորությունը, ցավոք»։ 

Անդրադառնալով դատարանների դռները շրջափակելու վերաբերյալ Նիկոլ Փաշինյանի հայտարարությանն ու դրանից հետո դատարանները շրջափակելու ակցիային՝ տիկին Հարությունյանն ասաց, թե դա հինգ տարվա վաղեմության հարց է, որն ինքը չի ցանկանում մեկնաբանել։ «Դուք քանի՞ տարվա վաղեմության հարց եք տալիս, Դուք ուզում եք հինգ տարի առաջվա ինչ-որ բան ես մեկնաբանե՞մ, որի իրավասությունը չունեմ»,-ասաց Արմենուհի Հարությունյանը։

Նրան հիշեցրինք, որ հինգ տարի առաջ Նիկոլ Փաշինյանը կոչ արեց շրջափակել դատարանների դռները, ինչին ի պատասխան՝ Փաշինյանի ստորագրությամբ փոխնախարար նշանակված մեր զրուցակիցն ասաց․ «Ես չեմ հիշում, որ անձամբ վարչապետը շրջափակած լինի դատարանի դուռը։ Գուցե նման կոչ եղել է, բայց ցուցում ես չեմ հիշում։ Ամեն դեպքում, դատական իշխանության դռների հետ կապված որևէ բան, որը տեղի է ունեցել նախկինում, կներեք, բայց մեկնաբանելու իմաստ չեմ տեսնում»։

Հիշեցրինք նաև, որ իր ասածը ոչ թե նախկինում է տեղի ունեցել, այլ ներկայում, քանզի խոսքը ներկա իշխանությունների արարքների մասին է, սակայն նա համարեց, որ դա, միևնույն է, ներկա չէ․ «Որովհետև ես ներկայում վերջին երկու-երեք տարիների ընթացքում նման լրատվության ծանոթ չեմ։ Ես հնգամյա վաղեմության որևէ գործողություն մեկնաբանելու անհրաժեշտություն չեմ տեսնում»։

Մանրամասն՝ տեսանյութում 

Վահե Մակարյան