«Իրավունք» թերթը գրում է.
«Էջմիածնի մեր աղբյուրների համաձայն, նախկին քաղաքապետ Դիանա Գասպարյանը շատ ծանր է տարել սկեսրոջը՝ քրգործով ներգրավվելու փաստը։
«Չեն մարսելու»,- սրտնեղել է նախկին թիմակիցների մոտ Գասպարյանը, ով ժամանակին անխոնջ հետեւում էր, թե ինչպես են փորձում ճնշել Արցախի հերոս, գեներալ Մանվել Գրիգորյանին»:
«Ժողովուրդ» օրաթերթը գրում է.
«Ռոմանոս Պետրոսյանի՝ ՀԷՑ-ի ժամանակավոր կառավարիչ նշանակվելուց հետո թեական պատկեր էր ստեղծվել, թե ամեն բան կխաղաղվի, սակայն իրավիճակն ավելի լարվեց։
Երեկ ՀէՑ-ի շուրջ եւս մի սկանդալ «պայթեց». ArmLur.am-ը գրեց, որ ըստ տեղեկությունների՝ Ռոմանոս Պետրոսյանը երեկ ՀԷՑ էր կանչել «Ջի Թի Բի» ընկերության սեփականատեր Գրիգոր Տեր-Ղազարյանին, եւ նրանք մտադրություն ունեն ՀԷՑ-ի բաժնեմասերը վաճառել կամ այլ եղանակով օտարել «Ջի Թի Բի» ընկերության սեփականատեր, ՔՊ-ի սիրելի գործարար Գրիգոր Տեր-Ղազարյանին։
Իրավիճակը դեռ չէր հանդարտվել ՀԷՑ-ում՝ մի շարք նոր նշանակումներ արվեցին, որոնք այդքան էլ պատահական չէին։
Ըստ «Ժողովուրդ» օրաթերթի բացահայտման, երեկ ՀԷՑ-ի գլխավոր տնօրենի տեղակալ, իրացման տնօրեն է նշանակվել Լեւոն Օհանեսյանը, որն այդքան էլ «պատահական» մարդ չէ։ Լեւոն Օհանեսյանը եղել է «Էնթերփրայզ Արմենիա» հիմնադրամի գլխավոր տնօրենը. հիմա այդ հիմնադրամը գլխավորում է ՀՀ ԱԳՆ Արարատ Միրզոյանի կինը՝ Գոհար Աբաջյանը։
Ըստ համադրվող փաստերի՝ ՀԷՑ-ի գլխավոր տնօրենի տեղակալ, էկոնոմիկայի եւ ֆինանսների տնօրեն է նշանակվել Արմեն Շահնազարյանը, որը նախկին իշխանությունների կադրերից է եղել։ Նա 2015 թվականի հունվարի 22-ին եղել է Հայաստանի Հանրապետության էկոնոմիկայի նախարարության աշխատակազմի ղեկավարը։
2017-2019 թվականներին եղել է «Հայաստանի արտահանման ապահովագրական գործակալություն» ԱՓԲԸ Տնօրինության նախագահ, Գործադիր տնօրենը։
ՀԷՑ-ի իրացման նոր տնօրենի տեղակալ, Երեւան քաղաքի էներգաիրացման սպասարկման տնօրեն է նշանակվել Արման Սմբատյանը, որը «Քաղաքացիական պայմանագիր» կուսակցության անդամ է։
Ստացվում է, որ ՀԷՑ-ը ոչ միայն «խլվել է», այլեւ «ՔՊ-ացվել»»։
«Հրապարակ» թերթը գրել է․
ՀԷՑ-ի վերաբերյալ Ստոկհոլմի արբիտրաժի որոշման մասին համառոտ հայտարարությունից հետո Սամվել Կարապետյանի պաշտպանական թիմը լռել է, փոխարենը իշխանականներն աշխուժացել են, թե դա հաղթանակ համարել չի կարելի` արբիտրաժային դատարանն ընդամենը հայցի ապահովման միջոց է կիրառել։
Բանն այն է, որ Ստոկհոլմի դատարանի որոշումը ժամանակավոր բնույթ ունի եւ կորցնում է ուժը, եթե 30 օրվա ընթացքում կողմերը չդիմեն հիմնական արբիտրաժային կազմավորմանը, կամ եթե մինչեւ 90-օրյա ժամանակահատվածում չհաստատվի վերջինիս իրավազորությունը։
Իշխանությունից շտապեցին հայտարարել, որ չեն կատարելու դատարանի որոշումը, արդարադատության նախարար Սրբուհի Գալյանն իբրեւ հիմնավորում ներկայացրեց․ «Ներպետական օրենսդրությամբ եւ ոչ միայն, նաեւ միջազգային կոնվենցիայով կա հնարավորություն՝ այդ որոշումը չկատարելու, եթե դա հակասում է հանրային կարգին»։
Իսկ Ռոմանոս Պետրոսյանը երեկ ղեկավար կազմում նշանակումներ արեց, բոլորը՝ դրսից: Կան տեղեկություններ, որ ամեն ինչ կախված է Փաշինյանի ռուսաստանյան այցի արդյունքներից` եթե Փաշինյանը գործարքի գնա ՌԴ-ի հետ, ապա բոլորովին թքած կունենան միջազգային դատարանի ցանկացած որոշման վրա։