Կառավարությունը Վազգեն Մանուկյանի գլխավորած ԱԺՄ կուսակցությանը խաբեությամբ հանել է Իսահակյան 28 հասցեում գտնվող շենքից, որտեղ կուսակցության գրասենյակն էր։ Այն փոքր՝ ընդամենը 46 քմ մակերեսով մի տարածք էր, որը տասը տարուց ավելի է՝ վարձակալական հիմունքներով զբաղեցնում էր նախկին վարչապետի կուսակցությունը։ 

MediaHub-ին պատմեցին, որ մարտ ամսին, երբ լրացել է պայմանագրի ժամկետը, ԱԺՄ-ից նամակով դիմել են Պետգույքի կառավարման կոմիտեին՝ հայտնելով, որ ցանկանում են երկարացնել պայմանագրի ժամկետը։ Սակայն պետգույքից պատասխանել են, որ նպատակահարմար չեն գտնում երկարացնել։ ԱԺՄ-ից նորից նամակ են գրել՝ հարցնելով, թե ո՞րն է պատճառը, որ չեն ցանկանում երկարացնել պայմանագրի ժամկետը, արդյոք աճուրդի՞ է դրվելու տարածքը, որ իրենց գործողություններն իմանան, սակայն այդպես էլ որևէ պատասխան չեն ստացել։ Հուլիսի կեսերին անակնկալ կերպով հայտնվում են ոստիկաններ՝ տեղեկացնելով, որ պետք է  տասն օրվա մեջ տարածքն ազատեն, որպեսզի իրենք կարողանան աճուրդ հայտարարել։

ԱԺՄ-ից առաջարկել են գոնե իրերը թողնել, որ եթե մրցույթով նորից իրենց հասնի այդ տարածքը, գոնե երկու անգամ իրերը չտեղափոխեն։ Բայց Պետգույքի կառավարման կոմիտեից չեն համաձայնել՝ պահանջելով անպայման ու անհապաղ դատարկել տարածքը։ Երկու օրվա մեջ դատարկել են տարածքը, որից հետո իրենք պարբերաբար կապի մեջ են եղել Պետգույքի կառավարման կոմիտեի տարբեր աշխատակիցների հետ, այդ թվում՝ Կոմիտեի նախագահ Առնակ Ավետիսյանի քարտուղարուհու, Կոմիտեի իրավաբանի և վարձակալության վարչության պետի հետ, երեքն էլ վստահեցրել են, որ լինելու է աճուրդ, որին կարող է մասնակցել նաև ԱԺՄ, բայց, պարզվում է, ստել են, քանզի որոշ ժամանակ անց ԱԺՄ-ից պարզել են, որ այդ տարածքը դեռ հունիս ամսին արդեն անհատույց տրամադրած են եղել մեկ այլ կազմակերպության։ 

Այդ կազմակերպությունը, պարզվում է, Ծանրամարտի ֆեդերացիան է, որի նախագահը Նիկոլ Փաշինյանի աշխատակազմի ղեկավար Արայիկ Հարությունյանն է։ Այդ մասին ԱԺՄ-ում իմանում են տարածքն ազատելուց մի քանի օր անց, երբ տեղեկանում են, որ ինչ-որ մարդիկ վերանոգորման աշխատանքներ են կատարում իրենց տարածքում։ Հետո իրենց զանգահարում է Ծանրամարտի ֆեդերացիայի քարտողարը՝ Սամվել անունով, և հայտնում, որ այդ տարածքը մեկ ամիս առաջ կառավարության որոշմամբ անհատույց հատկացվել է իրենց։ Դրանից հետո արդեն Պետգույքի կառավարման կոմիտեն էլ է խոստովանում, որ ԱԺՄ-ից գաղտնի այդ տարածքը անհատույց կարգով հատկացրել են Ծանրամարտի ֆեդերացիային։ 

Փաստորեն, Վազգեն Մանուկյանից խլել են տարածքը, որ տան Արայիկ Հարությունյանի գլխավորած ֆեդերացիային, ընդ որում, եթե Վազգեն Մանուկյանի ԱԺՄ-ն տարածքի վարձակալության դիմաց պետությանը գումար է վճարում՝ ամեն ամիս մոտ 200 հազար դրամի չափով, ապա Արայիկ Հարությունյանի գլխավորած ֆեդերացիան ոչ մի կոպեկ էլ չի վճարելու՝ պետգույքի բալանսում գտնվող տարածքը շահագործելու է լրիվ անհատույց։

MediaHub-ը դիմեց Պետգույքի կառավարման կոմիտե՝ մեկնաբանություն ստանալու այս ամենի վերաբերյալ։ Կոմիտեից մեզ ներկայացրին հետևյալ ժամանակագրությունը, թե երբ ինչ են արել, ինչ նամակի են պատասխանել և այլն։

Այսպես, պետգույքի կառավարման կոմիտեի ուղարկած պատասխանում նշված է, որ 07.03.2022 թվականին վարձակալության պայմանագիր է կքնվել ԱԺՄ-ի հետ 3 տարի ժամկետով, պայմանագրի ժամկետը լրանալուց հետո 15-օրյա ժամկետում Կոմիտեն դիմել է Կադաստրի կոմիտե պայմանագրի դադարեցման համար։ 

«26․03․2025 թվականին պայմանագիրը միակողմանի դադարեցվել է։ Պայմանագրի մյուս կողմը տեղեկացվել է, որ տարածքը պետք է ազատի, սակայն 30․07․2025 թվականի դրությամբ շարունակել են տարածքը զբաղեցնել, ուստի իրականացվել է վտարում։ Տարածքը կառավարության համապատասխան որոշմամբ անհատույց օգտագործման իրավունքով տրամադրվել է Հայաստանի ծանրամարտի ֆեդերացիային։ Հարկ ենք համարում շեշտել, որ Կոմիտեն այդ ողջ գործընթացն իրականացրել է իրեն տրված լիազորությունների և իրավասությունների շրջանականերում»,- ասված է Կոմիտեի պարզաբանման մեջ։

Ինչ վերաբերում է պնդմանը, թե ԱԺՄ-ն դիմումներ է հղել Պետգույքի կառավարման կոմիտեին, որոնք անպատասխան են մնացել, ապա Կոմիտեից նշել են, որ այս տարի ներկայացվել է դիմում 21․01․2025թ․-ին, որին պատասխանվել է փետրվարի 24-ին, ևս մեկ դիմում էլ ԱԺՄ-ի կողմից Կոմիտե է ներկայացվել 31․07․2025թ․-ին, որի պատասխանը կտրվի մինչև օգոտոսի 19-ը։ Այսինքն՝ խոստովանել են, որ վերջին դիմումին մինչ օրս դեռ չեն պատասխանել։

Վահե Մակարյան