Բարձրագույն դատական խորհուրդը որոշել է ՀՀ նախագահին առաջարկել Նարեկ Աշոտի Գաբրիելյանի թեկնածությունը՝ Վերաքննիչ քաղաքացիական դատարանի նախագահի պաշտոնի թափուր տեղում նշանակելու համար:

MediaHub-ը ուսումնասիրեց, թե ո՞վ է Նարեկ Գաբրիելյանը,  ի՞նչ կենսագրություն ունի և ի՞նչ ունեցվածք։

Նկատենք, որ Գաբրիելյանի կարիերայի մեկնարկը տրվել է 2009 թվականին, երբ նա աշխատանքի է անցել ՀՀ ԳԱԱ գիտակրթական միջազգային կենտրոնի իրավագիտության ֆակուլտետում (մինչև այսօր)։ Նարեկ Գաբրիելյանը դասավանդել է նաև մի քանի այլ ակադեմիաններում։

2021 թվականից ՀՀ նախագահի հրամանագրով նշանակվել է Վերաքննիչ քաղաքացիական դատարանի դատավոր:

Գաբրիելյանի հաշվետու՝ 2024 թվականի հայտարարագիրը ուսումնասիրելով տեսնում ենք, որ նա ունի մեկ բնակարան (2019 թվականին ձեռք բերված) և մեկ հողամաս (2003 թվականին ձեռք բերված): Նաև 90 օրից ավելի փաստացի տիրապետել է ևս մեկ հողամասի և անհատական բնակելի տան՝ հողամասի վրա կառուցված, իր տնտեսական շինություններով։

Որպես տրանսպորտային միջոց Գաբրիելյանը հայտարարագրել է 2015 թվականին արտադրված MAZDA մակնիշի ավտոմեքենա, որը ձեռք է բերել հենց 2015-ին։

Նրա բանկային հաշիվներից մեկի մնացորդը տարվա սկզբին կազմել է 190 հազար դրամ, ինչը հաշվետու տարվա վերջում դարձել է 109 հազար դրամ։

Նարեկ Գաբրիելյանի էլեկտրոնային հաշվի մնացորդը տարվա սկզբին եղել է 1000 դրամ, ինչը տարվա վերջում զրոյացվել է։

ՀՀ Վերաքննիչ քաղաքացիական դատարանի նախագահի թեկնածուի կանխիկ դրամը հաշվետու տարվա սկզբին կազմել է 3 հազար դոլար (տարվա վերջում պահպանվել է) և 26 մլն 650 հազար դրամ, որն էլ տարեվերջին դարձել է 34 մլն 150 հազար դրամ։

Նարեկ Գաբրիելյանի հաշվետու տարվա եկամուտը կազմել է 18 մլն 711 հազար դրամ, որից 13 մլն 682 հազար դրամը ԲԴԽ-ից ստացված աշխատավարձն է։

Հաշվետու  տարվա դեկտեմբերի 31-ի դրությամբ նրա փոխառության մնացորդը կազմել է 19 մլն 999 հազար դրամ։

Էմմա Մարտիրոսյան