Նիկոլ Փաշինյանը Վեհափառ Հայրապետի մասին 3 օր չի գրել որևէ բան: Երբ հավատացյալ զավակները Վեհափառին դիմավորեցին և հստակ իրենց աջակցությունը ցույց տվեցին Հայաստանյայց Առաքելական Սուրբ եկեղեցուն և Վեհափառ Հայրապետին, նա հասկացավ որ չի կարող այս պահին ինչ-որ մի բան անել ու ինչ-որ մի արդյունքի հասնել: Այս մասին News.am-ի հետ հարցազրույցում ասաց “Հայրենիք” կուսակցության նախագահ Արթուր Վանեցյանը։
«Ի՞նչ նպատակ ուներ Նիկոլ Փաշինյանը, երբ թիրախավորում էր եկեղեցուն և Վեհափառին: Նիկոլ Փաշինյանի անցած ճանապարհը, երբ մենք նայում ենք, իր բոլոր քայլերը ունեցել են մեկ նպատակ՝ իր ընտրազանգվածին ավելի կուռ դարձնելու և իր ընտրազանգվածը իր շուրջ համախմբելու, բայց եկեղեցու դեմ տարվող իր քարոզը, վստահ եմ, իրեն չի բերելու ոչ մի ձայն, ընդհակառակը։
Հայ հավատավոր ազգն իր ուրախության, թե տխրության պահերին լինում է եկեղեցում և եկեղեցի ասվածը դա շենքերը չեն, եկեղեցի ասվածը դա հոգևոր սպասավորներն են, որոնք իրենց աշխատանքով, իրենց խոսքով մարդկանց բերում են հավատքի»,- ասաց Վանեցյան։
Նա վստահություն հայտնեց, որ քաղաքական պայքարով է հնարավոր հեռացնել այս իշխանություններին, և որ ինքը որևէ վայրկյան չեմ դադարեցրել դա:
««Հայրենիք» կուսակցությունը բոլոր ընդդիմադիր ուժերի հետ ունի բարեկամական, ընկերական հարաբերություններ։ Չբացառելով փողոցային պայքարը՝ պետք է պատրաստվել ընտրություններին, դա է իմ դիրքորոշումը: Մեր կուսակցության հնարավորությունները գնահատում եմ շատ լավ, մեր կուսակցությունը շատ լուրջ աշխատանք է իրականացնում արդեն բավական երկար ժամանակ, Հայաստանի գրեթե բոլոր խոշորացված համայնքներում մենք հիմնել ենք «Հայրենիք» կուսակցության գրասենյակները, կուսակցական աշխատանքներն ակտիվ իրականացվում են»,- նշեց Վանեցյանը։