ԱՄՆ պաշտոնյաները հայտարարել են, որ Բաղդադում ԱՄՆ դեսպանատան ոչ առանցքային աշխատակիցները և նրանց ընտանիքները տարհանվելու են անվտանգության հետ կապված ռիսկերի աճի պատճառով: Նրանք չեն նշել, թե ինչն է պատճառը տարհանման, սակայն Իրանի միջուկային ծրագրի շուրջ բանակցությունները վերջին օրերին փաստացի փակուղի են մտել։
«Մենք անընդհատ գնահատում ենք մեր բոլոր դեսպանատներում անհրաժեշտ անձնակազմի քանակը: Մեր վերջին վերանայման հիման վրա մենք որոշել ենք կրճատել մեր առաքելության ներկայությունը Իրաքում», - BBC-ին ասել է ԱՄՆ Պետդեպարտամենտի խոսնակը։
Պաշտոնյաները չեն նշել, թե ինչն է դրդել ԱՄՆ իշխանություններին տարհանել դեսպանատան աշխատակիցներին։
CBS-ը, հղում անելով աղբյուրներին, հաղորդել է, որ Վաշինգտոնը տեղեկացել է Իսրայելի՝ Իրանում գործողություն սկսելու պատրաստակամության մասին: ԱՄՆ-ն վախենում է, որ Իրանը կարող է հակահարված տալ Իրաքում որոշ ամերիկյան օբյեկտների։