Հայաստանի իշխանությունները ոչ միայն չեն կարողանում Ռուսաստան արտահանվող կոնյակի անխոչընդոտ տեղափոխումն ապահովել, այլև իրենք են խոչընդոտներ հարուցում հայ արտահանողների համար:
Հիշեցնենք, մոտ մեկ ամիս է` հայկական կոնյակով բարձված բեռնատարները ինչ-որ սանիտարական ստուգման պատրվակով կանգնած են Վրաստանի տարածքում և չեն կարողանում առաջ շարժվել, քանի որ Վրաստանի համապատասխան ծառայություններն արհեստական խոչընդոտներ են հարուցում հայկական կոնյակ արտադրողների համար` պահելով մեքենաները Թբիլիսիի մոտ գտնվող ինչ-որ բազայում: Այս ընթացքում հատվածական բեռնատարների մի մասը բաց են թողել դեպի Վրաստան, սակայն տասնյակ մեքենաներ դեռ պահվում են Վրաստանի տարածքում:
Բայց սա դեռ ամենը չի: Քիչ առաջ MediaHub-ին ահազանգեցին, որ մոտ մեկ ժամ առաջ ՀՀ մաքսային ծառայությունները արգելել են հայկական կոնյակի արտահանումը` թույլ չտալով կոնյակով բարձված բեձնատարները հատեն հայ-վրացական սահմանն ու դուրս գան Հայաստանից: Մասնավորապես, Չարբախում գտնվող մաքսատանը հրաժարվել են ձևակերպել բեռն ու համապատասխան փաստաթղթերով ճանապարհել դեպի Ռուսաստան: Թե ինչով է սա բացատրվում, որևէ հիմնավորում չեն ներկայացրել:
Փաստորեն, ՀՀ իշխանությունները որոշել են միանալ Վրաստանի իշխանությունների արշավին` ընդդեմ հայկական կոնյակ արտադրողների, և հենց Հայաստանից են արգելում տեղական արտադրանքի արտահանումը ռուսական շուկա:
Վահե Մակարյան