«Հրապարակ» թերթը գրել է․
2020թ․ նոյեմբերի 9-ի իրադարձություններից շուրջ 5 տարի անց իրավապահները մասկի շոուներով ներխուժում են քաղաքացիների տներն ու ձերբակալում նրանց։ Փաշինյանը որոշել է հանրությանը վախի մեջ պահել, անպաշտպանության զգացում սերմանել բոլորի մեջ։ Պատահական չէ, որ վերջին բոլոր խուզարկություններին մասնակցում են ԱԱԾ «Ալֆայի» հատուկ ջոկատայինները՝ դիմակավորված, զինված: Թե ինչու են այդ պարապած տղերքին ուղարկում անզեն կանանց ու երիտասարդների վրա, պարզ է` սարսափ տարածելու։
Երեկ 2 մեքենա՝ ԱԱԾ-ականներով լցված, գնացել է 2 անչափահաս երեխաների մայր Հասմիկ Թադեւոսյանի տուն։ Նա նոյեմբերի 10-ի գիշերը կառավարության շենքում է եղել։ Հասմիկի քույրը՝ Սուսաննա Թադեւոսյանը մեզ պատմեց, որ քրոջը բերման ենթարկելիս մի խայտառակ շոու են սարքել աշխատավայրում` գործընկերների աչքի առաջ։ «Սկզբում տուն են մտել քաղաքացիական հագուստով ուժայինները։ Այդ ժամանակ Հասմիկն աշխատավայրում էր, ուղեկցել եմ նրանց այնտեղ։ Երբ Հասմիկն ասաց, որ չի կարող իրենց հետ գնալ, քանի որ աշխատում է, ագրեսիվ դրսեւորումով նստեցրին ԱԱԾ մեքենան ու տարան։ Զանգել եմ փաստաբան Ռուբեն Մելիքյանին, ասել է, որ չի կարող օգնել` նիստեր ունի, խորհուրդ է տվել այլ փաստաբան գտնել։ Դիմել եմ Սամվել Կարապետյանի փաստաբանական խմբին, օգնության է հասել Արման Ալիխանյանը։ Աջափնյակի քննչականից քույրս զանգեց, ասաց, որ ձերբակալման որշում են կայացրել։ Քննչական գործողությունները տեւել են մոտ 6 ժամ, որից հետո գիշերը ժամը 11-ին տարել են դատարան»։ Զրուցակիցս ԲՀԿ անդամ է, 2018-ին պատգամավորի թեկնածու է եղել։ Ասաց, որ սա քաղաքական հետապնդում է, քանի որ ե՛ւ ինքը, ե՛ւ քույրը ակտիվ մասնակցել են բոլոր ընդդիմադիր ցույցերին։ Բայց դատավոր Էդուարդ Մկրտչյանը չի բավարարել քննիչի միջնորդությունը:
«Դատարանը որոշել է ազատ արձակել՝ տեսնելով, որ նա ընդամենը հարվածել է դռանը, այդ արարքը հետեւանք չի ունեցել, դուռը չի կոտրվել։ Դատավորը սահմանել է վարչական հսկողություն, չնայած քննիչը միջնորդում էր, որ 2 ամսով կալանավորեն երկու անչափահաս երեխաների մորը, եւ միջնորդել էր, որ Հասմիկը չմասնակցի հավաքներին, չլինի հասարակական վայրերում։ Դատավոր Էդուարրդ Մկրտչյանը դա նրա սահմանադրական իրավունքների ոտնահարում համարեց եւ մերժեց քննիչի միջնորդությունը»,- ասաց Սուսաննան՝ հավելելով. «Որպես այս իրավիճակում հայտնված մարդ՝ ուզում եմ բարձրաձայնել՝ ինձ ոչ թե կոտրում են, այլ այսպես ավելի են ուժեղացնում։ Ես 2 տղա ունեմ, պատրաստ եմ անգամ իրենց կալանավորված տեսնել, բայց չլռել։ Իրենք չեն կարող այս ռեպրեսիաներով մեզ լռեցնել»։
Քննչական կոմիտեն երեկ հայտնեց, որ նոյեմբերի 10-ին կառավարության եւ Ազգային ժողովի վարչական շենքերում տեղի ունեցած դեպքերի հետ կապված՝ եւս 7 անձի ինքնություն են պարզել եւ ձերբակալել: Դեպքերից 5 տարի հետո միջնորդություններ են ներկայացվել դատարան՝ 7 անձի նկատմամբ որպես խափանման միջոց վարչական հսկողություն ընտրելու վերաբերյալ:
Մանրամասները թերթի այսօրվա համարում։