Շատ բարդ իրավիճակ է ստեղծվել մեր տարածաշրջանում և հատկապես Հայաստանի Հանրապետության համար, միգուցե մարդիկ և շատ-շատերը չեն գիտակցում, թե ինչո՞վ կարող է դա ավարտվել բայց հավատացեք՝ թույլ Իրանը Հայաստանի համար լրջագույն սպառնալիք է: Իրան-Իսրայել հակամարտության մասով News.am-ին տված հարցազրույցում ասաց "Հայրենիք" կուսակցության նախագահ Արթուր Վանեցյանը։

«Հայաստանի Հանրապետության անվտանգության ճարտարապետության մեջ Իրանը ունի շատ կարևոր բաղադրիչ և ուժեղ Իրանը, կայուն Իրանը միանշանակ այսօրվա ստեղծված իրավիճակում, երբ Ադրբեջանը և Թուրքիան ագրեսիվ հայտարարություններով, ինչու չէ, նաև քայլերով , մշտապես փորձում են Հայաստանի Հանրապետության տարածքները զավթել և փորձում են ուժային տարբերակով Հայաստանին պարտադրել տարբեր զիջումների գնալ, այսօր շատ արդիական է այդ հարցը։ Ե՛վ Ադրբեջանը, և՛ Թուրքիան, ես կարծում եմ, որ եթե շարունակվի այս պատերազմը երկար կարող են այդ առիթից օգտվել»,- ասաց Վանեցյանը։

Այսպես կոչված «Զանգեզուրի միջանցքի» մասով Վանեցյանը նշեց. «Մենք գիտակցում ենք բոլորս, որ Իրանը նախօրոք իմացել է , որ ինչ-որ մի օր հարձակումը լինելու է իր երկրի վրա, և Իրանը բազմիցս հայտարարել է, որ «Զանգեզուրի միջանցքը» անթույլատրելի է, ընդ որում, հայտարարել է տարբեր մակարդակներով: Իսրայելի հարձակումից ուղիղ մեկ օր առաջ Նախիջևանում սկսվել են թուրք-ադրբեջանական զորավարժությունները, ընդ որում, երկու զորավարժություններ են տեղի ունենում հրամանատարաշտաբային, ինչպես նաև զորքերի հստակ, ցամաքային օպերացիայի ինչ-որ մի զորավարժություն է,  որտեղ օգտագործվում են տանկեր, օգտագործվում են զինվորներ: Ինչո՞ւ է մեկ օր առաջ նման զորավարժություն արվում Նախիջևանում, ինչո՞ւ են կուտակում այդ տարածաշրջանում այդքան զորք։  Կհիշե՞ք, 44֊օրյա պատերազմից առաջ էլի սկսվեցին զորավարժություններ Ադրբեջանի կողմից,  ու ինչ-որ մի փուլում այդ զորավարժությունները վերածվեցին լայնածավ 44֊ օրյա պատերազմի»։

Նա հույս հայտնեց, որ այս պատերազմը երկար չի տևի.

«Հույս ունեմ, որ այս պատերազմը արագ կանգնելու է, ընդ որում թե՛ իրանական, թե՛ իսրայելական տարբեր պաշտոնյաներ խոսում են, որ պատրաստ են ինչ-որ բանակցությունների։ Եթե փակվեց իրանական ճանապարհը, պատկերացրեք՝ մնալու ենք բացառապես Վրաստանի հույսին, փաստացի, Հայաստանը երեք կողմից լինելու է շրջափակման մեջ։ Ամերիկայի Միացյալ Նահանգները միանշանակ պաշտպանելու են Իսրայելին։ Դա փաստ է, բայց նաև շատ կարևոր հանգամանք կա, որ նախագահ Թրամփը պատերազմը սկսվելու օրվանից ասում է, որ հնարավորություն կա բանակցելու և պատերազմը կանգնեցնելու: Հույս ունենանք, որ այդ բանակցությունների արդյունքում պատերազմը կանգնելու է, բայց այդ պատերազմը չի ավարտվելու, այս պատերազմը հետաձգվելու է»,- նշեց Վանեցյանը:

Ի՞նչ է անում Հայաստանի իշխանությունն այս իրավիճակում.

«Նիկոլ Փաշինյանը, որպես մի պետություն, որը ուղիղ հարևան է Իրանին, պարտավոր էր առաջին օրը  զանգահարել Իրանի նախագահին և գոնե զորակցություն հայտնել,  այստեղ պետք է հրավիրվեր Անվտանգության խորհրդի նիստ, հստակ որոշումներ կայացվեր, թե որ սցենարի դեպքում Հայաստանը ինչ պետք է անի: Մեր Զինված ուժերը պետք է բերվեին բարձր պատրաստվածության մակարդակի: Մենք պետք է անցնեինք մարտական հերթապահության, որը, ցավոք սրտի,  չի արվել»։

Արթուր Վանեցյանը նշեց, որ մենք ունենք քաղաքական իշխանություն, որն ապացուցել է՝ որևէ կերպ չի կարողանում դիմադրել արտաքին սպառնալիքներին, մասնավորապես,  Թուրքիայի և Ադրբեջանի սպառնալիքներին։  "Իրենք ասում են, որ մենք Թուրքիայի և Ադրբեջանի հետ գնում ենք խաղաղության, բայց Թուրքիայի և Ադրբեջանի պահանջների նախադասությունը վերջակետ չունի, այդ նախադասությունն ավարտվում է բազմակետով, մենք ինչ փորձենք տալ Թուրքիային կամ ադրբեջանցիներին, մեկ է պահանջն ամեն անգամ շատանալու է: Թուրքիան և Ադրբեջանը համարում են, որ Հայաստան պետությունը, առհասարակ հայկական պետականությունը, ուղիղ սպառնալիք է իրենց համար և իրենք բոլոր քայլերը ձեռնարկում են, որ Հայաստան պետությունը քայքայվի»,- ասաց նա:

Այս իշխանությունները, ըստ Վանեցյանի, վախեցնում են ժողովրդին, թե եթե մենք չլինենք` անպայման լինելու է պատերազմ, 2021 թվականին այդ խոսույթով, այդ ստով հաղթեցին ընտրություններում: "Մենք ունենք 4000 և ավելի զոհ, ունենք մի սթրեսային իրավիճակ երկրում, իրենք ասացին՝ մենք ենք միակը, որ կբերի խաղաղություն, տեսանք, որ խաղաղություն իրականում չկա, ուղղակի քայլ-քայլ այս իշխանությունները կատարում են  Ադրբեջանի և Թուրքիայի պահանջները։ 

Հարցին, եթե հիմա Սյունիքի վրա հարձակվեն ադրբեջանցիները, ի՞նչ կանի Ռուսաստանը, Վանեցյանը պատասխանեց. «Ես հույս ունեմ, որ Ռուսաստանը ինչ-որ լուրջ քայլերի կգնա և չի թույլ տա էսկալացիան, բայց, դրա հետ մեկտեղ նաև, Ռուսաստանը ուզում է Սյունիքում՝ Կապանում իր հյուպատոսությունը հիմնել, բայց իշխանությունները ամեն կերպ խոչընդոտում են այդ գործընթացին, անընդհատ հետաձգում են: Տեսեք, Իրանը հիմնեց, Ֆրանսիան հիմնեց, Ռուսաստանը հայտարարել է իր ցանկության մասին, բայց մինչ օրս իշխանությունները խոչընդոտում են։ Հայաստանի Հանրապետությունը պարտավոր է այնպիսի դիվանագիտություն վարի, որ իր շահը գտնի գերտերությունների շահերի համընկման կետում, դա ամենակարևորն է։ Ցավոք սրտի, այս իշխանությունները քանդել են առհասարակ պետական կառավարման համակարգը»։