Իրանական տեղեկատվական հարթակները հաղորդում են, որ Իրանի Իսլամական Հանրապետության պառլամենտը` Մեջլիսը, միաձայն որոշում է ընդունել Հորմուզի նեղուցը փակելու մասին։ Այժմ, Մեջլիսի կողմից որոշումն ընդունելուց հետո մնում է Իրանի գերագույն հոգևոր առաջնորդ Ալի Խամենեի որոշումը, որը կլինի վերջնական։
Հորմուզի նեղուցի հնարավոր փակումն ինքնասպանություն կլինի Իրանի տնտեսության համար։ Այս մասին NBC News-ին տված հարցազրույցում հայտարարել է ԱՄՆ փոխնախագահ Ջեյ Դի Վենսը։
Նրանից հարցրել են, արդյոք նեղուցի հնարավոր փակումը կարմիր գիծ կլինի Միացյալ Նահանգների համար։
«Կարծում եմ, որ դա ինքնասպանություն կլինի հենց իրանցիների համար։ Նկատի ունեմ, որ նրանց ամբողջ տնտեսությունը կախված է Հորմուզի նեղուցից։ Եթե նրանք ցանկանում են կործանել իրենց տնտեսությունը և խափանումներ առաջացնել աշխարհում, կարծում եմ, դա նրանց որոշումն է։ Բայց ինչո՞ւ դա անել։ Չեմ կարծում, որ դա իմաստ ունի։ Չեմ կարծում, որ դա իմաստ ունի նրանց կամ որևէ մեկի համար», - ասել է Վենսը։
Հիշեցնենք, որ ԱՄՆ-ն գիշերը հարվածել է Իրանի միջուկային օբյեկտներին, այդ թվում՝ Ֆորդոյին. հայտնել է ԱՄՆ նախագահ Դոնալդ Թրամփը՝ գրառմամբ։
ԱՄՆ-ն արձակել է 6 բունկերներ պայթեցնող ռումբ Ֆորդոուի վրա։ 30 Tomahawk տեսակի հրթիռներ հարվածել են Նաթանզի և Սպահանի միջուկային օբյեկտներին։
Թարմացումներին ավելի արագ կարող եք հետևել՝ այստեղ