Նիկոլ Փաշինյանն այսօր առավոտյան մարդու իրավունքներին բռնացող հերթական գրառումը կատարեց ֆեյսբուքում՝ սպառնալով ՀԷՑ-ի աշխատակիցներին աշխատանքից ազատումով, եթե նրանք կհամարձակվեն դուրս գալ փողոց և պաշտպանել Սամվել Կարապետյանին։ Դա համընկավ ԱԺ-ի կողմից ՀԷՑ-ը «Տաշիր» ընկերությունների խմբից խլելու նախագծի քննարկման և առաջին ընթերցմամբ ընդունման հետ։
«ՀԷՑ-ի այն աշխատողները, ովքեր իրենց գործը թողած՝ զբաղված են քաղաքական խարդավանքներով, հուլիսին կազատվեն աշխատանքից։ Նրանք, ովքեր ՀԷՑ աշխատակիցներին պարտադրում են հավաքների մասնակցել, նաեւ կդատվեն»,- գրել է «դեմոկրատիայի բաստիոնի» բռնապետը։
MediaHub-ը դիմեց Մարդու իրավունքների պաշտպան, իրեն չափազանց անկախ ՄԻՊ համարող Անահիտ Մանասյանին՝ ճշտելու նրա դիրքորոշումը, թե արդյոք Փաշինյանի այս գրառման մեջ մարդու իրավունքների խախտում և սպառնալիք չի՞ տեսնում։
Մի քանի ժամ անց ՄԻՊ աշխատակազմից մեզ փոխանցեցին Անահիտ Մանասյանի պատասխանն ու դիրքորոշումը այս հարցին․ «Մարդու իրավունքների պաշտպանի աշխատակազմի կողմից զանգվածային լրատվության միջոցների ու սոցիալական ցանցերի հուլիսի 2-ի դիտարկումն արձանագրել է ՀԷՑ աշխատակիցների վերաբերյալ հրապարակումներ: Դրանք սահմանված կարգով ուսումնասիրվում են և արդյունքներով պայմանավորված` Մարդու իրավունքների պաշտպանի աշխատակազմը հանդես կգա հրապարակային: Միևնույն ժամանակ, կարևոր ենք համարում ընդգծել, որ անձանց աշխատանքային իրավունքներն ու հավաքների ազատության իրավունքը պետք է երաշխավորված լինեն, իսկ այդ առումով սահմանափակումներ կարող են կիրառվել բացառապես համապատասխան իրավական հիմքերի առկայության դեպքում և չափանիշների պահպանմամբ»։
Սրանով տիկին Մանասյանը ոչ ուղիղ, բայց ակնարկով հասկացրել է, որ իրենց «մեծարգո վարչապետը», ըստ էության, իրավունք չունի որևէ աշխատակցի աշխատանքից ազատել՝ խախտելով նրա աշխատանքային իրավունքները։ Բայց դեռ բավարար համարձակություն չի կարողացել ցուցաբերել այդ մասին ուղիղ տեքստով ասելու և Նիկոլ Փաշինյանին հասկացնելու, որ «հանգիստ նստի տեղը և դադարի այլոց իրավունքները խախտել»։
Վահե Մակարյան