Մեկ անգամ չէ, որ ՀՀ իշխանությունը տարբեր մակարդակներով հայտարարել է, որ ՀԱՊԿ-ին անդամակցելն արդեն որևէ իմաստ չունի։ Փաշինյանն էլ իր վերջին ասուլիսում նշեց, որ ավելի շուտ դուրս կգանք կազմակերպությունից, քան կապասառեցնենք մեր անդամությունը:

Եթե ՀՀ իշխանությունն իր այս քաղաքականությունը շարունակի, ապա 2026-ի փետրվարին, այսպես թե այնպես, Հայաստանը դուրս կմնա կազմակերպությունից, քանի որ, ըստ ՀԱՊԿ կանոնադրության, եթե անդամ պետություններից որևէ մեկը երկու տարի չի վճարում անդամության գումարը և բյուջեով նախատեսված ծախսերը, ապա քննարկում են այդ պետության՝ կառույցում մնալու նպատակահարմարությունը։ Եվ քանի որ մեր պետությունը որևէ հետաքրքրվածություն չի ցուցաբերում, ապա շատ հավանական է, որ մեզ պարզապես հեռանցեն կառույցից։

Թե անվտանգային առումով ինչ խնդիր սա կարող է առաջացնել, մեկ անգամ չէ, որ խոսել են մասնագետները։ Բայց ՀԱՊԿ-ից դուրս գալը նաև տնտեսական խնդիրներ է ստեղծելու Հայաստանի համար, քանի որ ՀՀ արտահանումների մեծ մասը ԵԱՏՄ շուկա է իրականացվում, մեծամասամբ՝ ՌԴ։ Իսկ ՀԱՊԿ-ից դուրս գալն առաջին հերթին նոտա է՝ ուղղված հենց ՌԴ-ին։ Եվ մնալ ԵԱՏՄ-ում դրանից հետո չի ստացվի:

ԱԺ «Հայաստան» խմբակցության պատգամավոր Թադևոս Ավետիսյանի խոսքով՝ տնտեսական հետևանքը շատ շոշափելի կլինի, թեև հիմա էլ ՀՀ-ն ԵԱՏՄ անդամ պետությունների շուկա դուրս գալու խնդիր ունի։

«Այս իշխանության վարած քաղաքականության հետևանքն է դա։ Փորձում են շուստիրություն անել, բայց չի անցնելու։ Ճիշտ է՝ ՀԱՊԿ-ն ու ԵԱՏՄ-ն լրիվ տարբեր կառույցներ են, բայց պարզ է, չէ՞, որ նույն պետության հետ գործ ունենք։ Այս իշխանությունն ամեն ինչ անում է՝ իր հարմարությանը նայելով, այստեղ պետական շահ չկա, կա սեփական իշխանությունը պահելու ձգտում»,- MediaHub-ի հետ զրույցում նշեց Ավետիսյանը։

Նրա խոսքով՝ ԵԱՏՄ շուկային այլընտրանք կարող էինք ունենալ, եթե այս իշխանությունը հաշվարկված քայլեր աներ։

«ԵՄ շուկա արտահանումներն աճելու փոխարեն նվազել են։ Դա ինչի՞ մասին է խոսում, որ ճիշտ աշխատանք չի տարվել։ Բա եթե դա էլ չունենք, ուրիշ ի՞նչ շուկա ենք դուրս գալու՝ թուրքակա՞ն։ Թուրքիան պատրա՞ստ է թույլ տալ, որ մեր տնտեսությունը զարգանա, եթե իր քաղաքականությունը լրիվ հակառակի մասին է։ Հիմա մենք ժամանակ ունենք ճիշտ հաշվարկներ անելու։ Եթե այս իշխանությունն իր սեփական քաղաքական շահից դուրս չգա ու ՀՀ պետական շահի մասին չսկսի մտածել, ապա լուրջ խնդիր ենք ունենալու»,- նկատեց պատգամավորը։

Հարցին, թե արդյո՞ք 2026-ի փետրվարից հետո ՀՀ տնտեսությունը կոլապսում կհայտնվի, Թադևոս Ավետիսյանը պատասխանեց՝ կոլապսի մեջ չէ, բայց մեծ դժվարությունների առաջ կկանգնենք, եթե քայլեր չարվեն։

Նարե Գնունի