Երեկ մամուլում հերթական անգամ տեղեկություն տարածվեց, որ Աշխատանքի և սոցիալական հարցերի նախարար Նարեկ Մկրտչյանը հնարավոր է՝ շուտով ազատվի զբաղեցրած պաշտոնից և նշանակվի ԱՄՆ-ում ՀՀ դեսպան՝ Լիլիթ Մակունցի փոխարեն։
Իսկ Մկրտչյանի փոխարեն, ըստ լուրերի, նախարար կնշանակվի Գյումրու ավագանու ՔՊ խմբակցության անդամ Սարիկ Մինասյանը, որին չհաջողվեց ընտրությունների արդյունքներով դառնալ Գյումրու քաղաքապետ։
MediaHub-ը փորձեց այս թեմայով մեկնաբանություն ստանալ Սարիկ Մինասյանից։ Վերջինս, չցանկանալով հեռախոսով հարցազրույց տալ, այդուամենայնիվ մի երկու բառ ասաց՝ հերքելով, թե նման բան կա։
«Պարապ կմնան, նյութ չեն ունենա, կբռնեն ինձ էս պաշտոնից էն պաշտոնին կնշանակեն»,- իր մասին հրապարակումներից դժգոհեց պարոն Մինասյանը։
-Դե, սկզբից ՀԷՑ-ի Շիրակի մարզի «Ղարս» մասնաճյուղի տնօրեն էին նշանակում, հիմա՝ նախարար, ի վերջո, կա՞ նման խոսակցություն, հերքո՞ւմ եք, թե՞ չեք բացառում։
-Չկա, չկա, որ լինի, կհայտարարեմ, բոլորն էլ կիմանան։
-Այսինքն՝ Ձեզ աշխատանքի և սոցիալական հարցերի նախարար չե՞ն նշանակի։
-Ոչ, ես չեմ էլ ուզենա, նախարարը չի կարա ավագանու մանդատը պահի՝ հասարակ լոգիկա է։
-Հասարակ լոգիկա է նաև, որ ավագանու մանդատը կարող եք դնել, հետո նշանակվել նախարար, դա բարդ բան չէ։
-Ես հայտարարել եմ, չէ՞, որ մանդատս չեմ դնի, մինչև հիմա չե՞ք հասկացել, որ ես սկզբունքային մարդ եմ, ինչ ասել եմ, էդ ասածիս տերն եմ։
-Լավ է, որ սկզբունքները պահում եք, բայց մի բան է ինչ-որ փուլում մանդատը չդնել, որ ցույց տաք՝ քաղաքապետ չդարձաք, բայց մանդատը պահեցիք, այլ բան է, որ որոշ ժամանակ անց Ձեզ առաջարկեն նախարար դառնալ, և որոշեք ընդունել առաջարկը։
-Շնորհակալ եմ, բայց ոչ։
Վահե Մակարյան