Էս մարդիկ քանդում են ամեն ինչ՝ անվտանգային համակարգ, տնտեսություն, առողջապահական ու կրթական համակարգ։ Այդ մասին ԼուրջCast հաղորդման շրջանակում ասել է ԱԱԾ նախկին տնօրեն, «Հայրենիք» կուսակցության նախագահ Արթուր Վանեցյանը։
Նրա խոսքով՝ կրթական համակարգում հիմա խայտառակ վիճակ է, մեր ինքնությունն են ուզում ոչնչացնել։
«Ու սուտ, բարձր խոսելով, գոռալով, մարդկանց վիրավորելով են այդ ամենն անում»,- նշել է նա։
Դիտարկմանը, որ այս ամենից հետո ինչո՞ւ փողոցում մարդկանց քանակ չի գեներացվում, Արթուր Վանեցյանն արձագանքել է՝ պետք է հստակ առաջարկ ներկայացվի։
«Պետք է մարդ ներկայացվի, ում շուրջ պետք է այդ կոնսոլիդացիան ձևավորվի։ Ու այդ մարդն ինքը պետք է կարողանա հասարակության մեջ ստեղծի կարծիք, որ ինքը կարող է լինել այս իշխանությունների այլընտրանքը։ Ցավոք սրտի, այս պահին վերջնական կերպարը չկա, որի շուրջ կլինի 100 տոկոսանոց կոնսենսուս։ Ինչո՞ւ չկա․ ես վստահ եմ, որ ընդդիմադիր դաշտում շատ են մարդիկ, որոնք կարող են լավ կառավարիչ լինեն։ Չկա, քանի որ իշխանություններն իրենց մանիպուլյատիվ նարատիվներով փորձում են մարդկանց շփոթեցնել։ Ի՞նչ են ասում՝ ընդդիմությունը կռվում է իշխանության համար, ուրիշ ոչ մի նպատակ չկա։ Հիմնական թեզերից մեկը դա է, բայց առանց իշխանության դու ո՞նց կարող ես իրագործել այն ծրագրերը, որոնք ներկայացնում ես, առանց իշխանության դու ո՞նց կարող ես մարդկանց կյանքը լավացնել»,- ասել է Արթուր Վանեցյանը։