«Հայաստանի էլեկտրական ցանցեր» ՓԲԸ-ն արդեն ստացել է ՀԽԿՀ նախագահի որոշումը Ռոմանոս Պետրոսյանին ՀԷՑ նոր կառավարիչ նշանակելու վերաբերյալ։ Այս պահին այդ որոշումն են ուսումնասիրում, որը բավականին ծավալուն փաստաթուղթ է։
Այս մասին MediaHub-ի հետ զրույցում ասաց ՀԷՑ տնօրենի ժամանակավոր պաշտոնակատար Դավիթ Ղազինյանը։
-Իսկ սպասելի՞ էր Ձեզ համար, որ այսպես արագ տեղի կունենար այս գործընթացը։
-Իհարկե, ես Ձեզ ասում էի, չէ՞, որ դեռևս հանձնաժողովի նախագահի որոշումը չեղած՝ իշխանություններն արդեն հայտարարում էին, որ նոր կառավարիչ պետք է լինի։ Բնականաբար, դա մի կենտրոնից ղեկավարվող պրոցես է, ՀԾԿՀ նախագահն էլ այդ որոշումը կայացրեց։
-Անկախ նրանից, թե այդ որոշումն ուսումնասիրելուց հետո ինչ եզրահանգման կգաք, երկուշաբթի օրը պատրաստվո՞ւմ եք Ռոմանոս Պետրոսյանին ըստ պատշաճի, այսպես ասած, ծաղիկներով, փուչիկներով դիմավորել։
-Այսինքն՝ Ձեր ասածն ընդունեմ որպես վիրավորա՞նք, թե՞ ոնց։ Դա վիրավորանք է, ես ծաղիկներով նրան ընդունեմ, որ ի՞նչ անեմ։ Ծաղիկներով ես կանանց եմ միայն դիմավորում։
-Ես անձամբ Ձեզ նկատի չունեմ, այլ ամբողջ հիմնարկը։
-Թեկուզ՝ հիմնարկը։ Բացի այդ, ես մի տեղ էլի եմ ասել, որ կարմիր գորգ փռել չեմ պատրաստվում, և մեր ընկերության սեփականատերը պետությունը, օրենքները հարգող մարդ է։ Քանի որ պետական կառույցները (էստեղ անձանց մասին խոսք չկա), այս դեպքում՝ ՀՀ Ազգային ժողովն ընդունել է օրենք, որի հիման վրա Հանրային ծառայությունները կարգավորող հանձնաժողովն ընդունել է որոշում, մենք էդ որոշումներին կենթարկվենք դեմ լինելով և բողոքարկելով։ Այսքան բան։
-Իսկ տրամադրություններն ինչպե՞ս են ՀԷՑ-ի ներսում։
-Շատ լավ, բնականոն աշխատանքի մեջ են բոլորը։ Երբ որ մի բանի երիար ժամանակ սպասում ես․․․ Նորից եմ կրկնում՝ էն, որ իրավական չի, քաղական է, անգրագիտություն է, էդ մասին ասել եմ մի քանի անգամ, բայց ինչո՞ւ պետք է դա մեզ մոտ տրամադրություն փոխի։
-Ի դեպ, ՀԷՑ կառավարիչը Կարեն Հարությունյանն է, որը երկրում չէ այս պահին, և Ռոմանոս Պետրոսյանը, փաստացի, հենց նրան է փոխարինելու։ Իսկ կարո՞ղ ենք ենթադրել, որ Դուք և ՀԷՑ մյուս առանցքային պաշտոնյաներ ևս կազատվեն զբաղեցրած պաշտոններից և այլևս չեք աշխատի ՀԷՑ-ում։
-Ինչո՞ւ, ես գլխավոր տնօրենի տեղակալ-իրացման տնօրեն եմ, հետո նոր եմ դարձել ԺՊ, իսկ ԺՊ չլինելու դեպքում իմ՝ գլխավոր տնօրենի տեղակալի հաստիքը կա։
-Դե, կարող է կա՛մ Դուք չցանկանաք աշխատել Ռոմանոս Պետրոսյանի հետ կամ ինքը չցանկանա աշխատել Ձեզ հետ։
-Իր չցանկանալը չեմ կարող մեկնաբանել՝ հաշվի առնելով, որ էդպիսի ցանկություն դեռևս չի արտահայտել, ինչ վերաբերում է իմ ցանկանալուն, ես ասել եմ՝ մենք մնալու ենք էստեղ, որովհետև հասկանում ենք՝ մեր դուրս գալով ինչ է կատարվելու, ու նաև տեսնում ենք, թե էստեղ պետական կառավարման շատ մարմիններ ինչպես են կառավարվում, ենթադրվում է՝ ՀԷՑ-ն էլ է նույն կերպ կառավարվում, իսկ մենք չենք ուզում, որ էդպես կառավարվի, որովհետև վերջնաժամկետում սա Սամվել Կարապետյանի սեփականությունն է և մնալու է իր սեփականությունը։
Վահե Մակարյան