Երեկ, ինչպես և սպասելի էր, նիկոլական արդարադատությունը կալանքի ուղարկեց գործարար, բարերար, «Տաշիր» ընկերությունների խմբի հիմնադիր Սամվել Կարապետյանին։ Այս ամենը զարմանալի չէր մեզ համար, քանզի Սամվել Կարապետյանի՝ Մայր Աթոռում տված կարճ հարցազրույցը, թեև մեզ համար տարօրինակ ու անսպասելի չէր, քանզի նորմալ է, որ հայ մարդը սատար կանգնի Հայ Առաքելական եկեղեցուն, բայց այ դրա դեմ պայքարող Նիկոլ Փաշինյանի համար պետական հեղաշրջման փորձ էր։ Այս դեպքում, ավելի շատ, ոչ թե պետական հեղաշրջման, այլ Փաշինյանի իշխանության կորստի մասին ակնարկ։ Համենայնդեպս, ինքը դա այդպես էր ընկալել, դրա համար էլ հրագանգեց, որ նրա վրա Քննչական կոմիտեն գործ կարգի, դատարանն էլ այն բավարարի և ուղարկի կալանքի։
Ակնհայտ է, որ Սամվել Կարապետյանը շատ լավ գիտեր՝ որտեղ և ինչ է խոսում և ինչ հետևանքներ է ունենալու իր այդ մի «անմեղ» հայտարարությունը։ Անզեն աչքով էլ երևում է, որ այդ հարցազրույցը պատահական չէր, և որ դրան պետք է ինչ-որ գործողություններ, դրան էլ՝ ինչ-որ պրոցեսներ հետևեն։ Եվ ակնհայտ է, որ Կարապետյանը դրանց պատրաստ պետք է լիներ:
Երեկ մինչև ուշ գիշեր Կարապետյանի բազմաթիվ աջակիցներ, համախոհներ դատարանի դռան դիմաց էին, և երբ իմացան դատարանի որոշումը, գլխիկոր ցրվեցին տներով։ Կարապետյանն այժմ բանտում է; նրա աջակիցները՝ իրենց գործերով։ Կամ գուցե այլ գործերով։ Իսկ ի՞նչ է տեղի ունենալու հետո։ Արդյոք կհետևե՞ն սրան քաղաքական պրոցեսներ։
Սամվել Կարապետյանի եղբորորդին՝ Նարեկ Կարապետյանը, որ Կարապետյան ընտանիքի՝ համեմատաբար ավելի տեխնոկրատ անդամն է և երեկ լրատվամիջոցների առջև հանդես գալու բարդ գործն ավելի շատ իր ուսերին էր դրված, հորեղբոր կալանքի մասին լուրն իմանալուց հետո այսպիսի հայտարարություն արեց․
«Էսօրվա որոշումը, փաստորեն, մի մեծ ճանապարհի սկիզբ է, ու էս ճանապարհը պետք է ունենա տրամաբանական ավարտ՝ հաղթական։ Էն հաշվարկը, որ մարդիկ արել են, իրենք, ոնց որ, սխալ հաշվարկ են արել էս մի անգամ, ոնց որ չի կպնելու։ Ես ուզում եմ բոլորիս մաղթել հետևողական ու ճիշտ պայքար, որ Հայաստանում ոչ մեկին չուզենան ու չկարողանան առանց պատճառի կալանավորեն, առանց պատճառի ուզենան զսպեն իր հայացքների համար»։
Իսկ ի՞նչ ճանապարհի մասին է խոսքը, քաղաքական պրոցեսնե՞ր են սկսվելու, հարցրեց MediaHub-ը Նարեկ Կարապետյանին, սակայն վերջինս մեր հարցն անպատասխան թողեց։ Այս օրերին, ինչ սկսվել է Սամվել Կարապետյանի դեմ այս ճնշումների շղթան, շատերի մոտ է հարց առաջանում՝ արդյոք Սամվել Կարապետյա՞նն է, որ պետք է փրկի Հայաստանը այս իշխանությւոններից, հատո՞ւկ է նա այսպես մտել պրոցեսի մեջ, արդյոք քաղաքակա՞ն հեռահար նպատականեր են հետապնդում Կարապետյանի ու Կարապետյանների այս հայտարարությունները, թե՞ այս ամենը զուտ Հայ Առաքելական Սուրբ եկեղեցու հավատավոր զավակին բռնաճնշումներից փրկելու, նրան բանտից ազատելուն ուղղված պայքար է, որն ավարտվելու է Կարապետյանի՝ բանտից դուրս գալով։ Կարծիքներն ու տպավորությունները տարբեր են, ինչպես տարբեր էին նաև երեկ դատարանի բակում հավաքված քաղաքական ուժերը, պահից օգտվող քաղաքական ու կիսաքաղաքական դեմքերը, անհատ ու դեգերող ակտիվիստները, և նրանց այդտեղ լինելու դրդապատճառները։ Ամենաառանցքային դերակատարները, սակայն, նրանք էին, որոնց ոչ ոք չէր ճանաչում, բայց նրանք այնտեղ էին։ Խոսքը ՀԷՑ-ի, դրա «քույր» կառույց «Գազպրոմի», «Տաշիր գրուպի» մեջ մտնող տարբեր ընկերությունների աշխատակիցների մասին է, ինչպես նաև Կարապետյանների անվտանգությունն ապահովող հուժկու երիտասարդների բանակի, որոնց այս տարիներին մենք չէինք հանդիպել պատերազմից հետո ձևավորված «Դիմադրության շարժման», «Հայրենիքի փրկության շարժման» կամ «Սրբազան պայքարի» հանրահավաքներին։ Փոխարենը նրանցից շատերը, մասնավորապես՝ նույն ՀԷՑ-ոի ու «Գազպրոմի» բազմաթիվ աշխատակիցներ, որոնց երեկ, ի դեպ, սպառնում էր Փաշինյանը՝ հայտարարելով, թե իրենց զոռով են բերել դատարանի բակ, 2018-ին լրիվ «հոժարակամ», իրենց բան ու գործը թողել իջել էին փողոց փակելու՝ Սերժին մերժելու և հանուն Նիկոլի։ Դրանից հետո այդ մարդիկ կտրուկ անհետացան ռադարներից ու այլևս չերևացին փողոցում՝ որպես հայրենիքի համար դժվարին պահերին պայքարող մարտիկներ։ Ու մեկ էլ հայտնվեցին երեկ՝ ի պաշտպանություն Սամվել Կարապետյանի հայտարարված հավաքի ժամանակ։ Հույս ունենանք՝ Սամվել Կարապետյանը, նրա ընկեր ու բարեկամ, նախկին վարչապետ Կարեն Կարապետյանը նորից կօգտագործեն իրենց հիմնարկներում աշխատող այս թանկ ու կարևոր ռեսուրսը, որը 2018-ին, ցավոք, սխալվեց, ու չեն բավարարվի միայն Սամվել Կարապետյանին կալանքից ազատելով, այլ իսկապես կփրկեն երկիրը:
Վահե Մակարյան