Դեռ նախորդ տարի գրել էինք, որ մարդու իրավունքների նախկին պաշտպան Արման Թաթոյանը, ՊԵԿ նախկին նախագահ Դավիթ Անանյանն ու Երևանի նախկին քաղաքապետ Հայկ Մարությանը պատրաստվում են կուսակցություն ստեղծել։ Գրել էինք, որ ակտիվ քննարկումների մեջ են: Մեր հրապարակումից հետո կողմերը շտապեցին հերքել, թե նման քննարկումներ կան։ Սակայն պարզվեց՝ MediaHub-ը չի սխալվել:
Այս օրերին ևս նման տեղեկություն ստացանք, որ նոր կուսակցություն է ստեղծվելու, և այս անգամ էլ փորձեցինք ճշտել՝ արդյո՞ք նոր կուսակցություն է ստեղծվելու նախկին երեք պաշտոնյաների կողմից։
«Այո, քննարկումների փուլում ենք։ Բայց Ձեր տեղեկությունը՝ Հայկ Մարությանի մասով, չի համապատասխանում իրականությանը»,- MediaHub-ի հետ զրույցում ասաց ՊԵԿ նախկին նախագահ Դավիթ Անանյանը։
Հարցին, թե արդյո՞ք երրորդ ուժ էլ է ներգրավված քննարկումներին, Դավիթ Անանյանը պատասխանեց․ «Այս պահին եկեք սահմանափակվենք այնքանով, որքանով որ Ձեզ ասացի։ Գտնվում ենք քննարկումների փուլում՝ առանց երրորդ ուժերի ներգրավման»։
Թեև Դավիթ Անանյանը, փաստացի, հերքում է Հայկ Մարությանի հետ ևս քննարկումներ ունենալու հանգամանքը, բայց մեր աղբյուրները պնդում են, որ նա նույնպես ներգրավված է այս գործընթացում՝ այս պահին գոնե քննարկումների մակարդակում։
Նշենք, որ Հայկ Մարությանի հետ կապ հաստատել մեզ չհաջողվեց, նրա հեռախոսն անհասանելի է: Թեպետ ճիշտ է ասել՝ տրանսպորտի թանկացման բոյկոտից հետո է Մարությանն անհասանելի ու խորը ընդհատակ անցել:
Հիշեցնենք, որ այսօր երկու ամսով կալանավորված Սամվել Կարապետյանը հայտարարեց նոր ուժ ձևավորելու մասին:
«Այս օրերին շատ քննարկվեց իմ ուղերձը, բայց ցավոք, իրականությունից կտրված տարբեր մեկնաբանություններ էլ արվեցին։ Կարծում եմ, որ ես շատ պարզ եմ արտահայտվել՝ ստեղծելու ենք սկզբունքորեն նոր քաղաքական ուժ։
Մեծ հարգանքով եմ վերաբերվում մինչ օրս Նիկոլ Փաշինյանի հակազգային իշխանության քաղաքականության դեմ իրական պայքար մղած քաղաքական ուժերին և գործիչներին։ Բայց մենք Հայաստանի համար լավ ապագա կառուցելու մեր պատկերացումն ունենք։ Ու գնալու ենք մեր ճանապարհով, մեր նոր թիմով՝ չբացառելով ներքաղաքական համագործակցությունը համախոհների հետ։ Փորձելու ենք համախմբել մեր ժողովրդին արդար ու մեծ նպատակների շուրջ։ Մերժելու ենք սև-սպիտակի և արհեստական մյուս բաժանումները, որպիսիք այս իշխանությունները փաթաթել են հասարակության վզին՝ պառակտելով ու թուլացնելով մեր երկիրը»,- մասնավորապես ասվում է ԱԱԾ մեկուսարանում գտնվող Սամվել Կարապետյանի նամակում:
Նարե Գնունի