Երեկ հայ-իրանական սահմանին խառնաշփոթ իրավիճակ էր ստեղծվել։ 

Իրան-Իսրայել պատերազմի հետևանքով շատ իրանցիներ գալիս են Հայաստան, որի արդյունքում կտրուկ բարձրացել է տրանսպորտային միջոցների և ավտոմեքենաների կողմից նրանց տեղափոխման արժեքը։

Եթե նախկինում տաքսիները մարդկանց Մեղրիից Երևան էին տեղափոխում մոտ 75 դոլարով (28 հազար դրամ), ապա հիմա` 220 դոլարով (շուրջ 85 հազար դրամ)։ Ավելին, երեկ ահազանգ եղավ, որ իրանցիներից մեկից 350 դոլար են ուզել Երևան տեղափոխելու համար:

Բացի սա, կա մտավախություն՝ եթե մեծ թվով իրանցիներ ժամանեն Հայաստան, ինչը չի բացառվում, այստեղ վերահսկողություն չի լինի, մասնավորապես, անշարժ գույքի շուկայում և կլինի բարձիթողի իրավիճակ։

Mediahub-ի հետ զրույցում Մեղրի համայնքի ղեկավար Խաչատուր Անդրեասյանը, անդրադառնալով տրանսպորտային միջոցների թանկացմանն ասաց, որ հանդիպել է ուղևորափոխադրողների հետ։

Նա հավաստիացրեց, որ առաջիկայում լինելու են ավտոբուսներ, միկրոավտոբուսներ, որոնք տեղափոխելու են Իրանից ժամանած մարդկանց։

«Մի քանի անգամ թանկ ուղևորափոխադրումը իրականացրել են անհատները, իրենց անձնական մեքենաներով»,- ասաց նա՝ ավելացնելով, որ առաջիկայում մի անձի տեղափոխությունը կարժենա 10-ից մինչև 15 հազար դրամ։

Նշենք, որ այսօր ՀՀ-ում ՌԴ դեսպանությունը հանդես էր եկել Իրանից ժամանող ՌԴ քաղաքացիների համար հայտարարությամբ, որում նաև նշված էին այն գները, որոնք գործում են Մեղրիից կամ Ագարակից Երևան տեղափոխվելու համար: 

Էմմա Մարտիրոսյան