Ասֆալտը դրոշակ դարձրած ու ասֆալտով իրենց կործանարար քաղաքականության հետևանքները «կոմպենսացնող» կառավարությունը տևական ժամանակ է՝ համայնքների ներկայացրած սուբվենցիոն ծրագրերը չի հաստատում։ Այդ ծրագրերով համայնքները պետք է կապիտալ ծախսեր կատարեն, օրինակ՝ հիմնանորոգեն համայնքում առկա որոշ ճանապարհներ, բայց կառավարությունը անհասկանալի պատճառներով ձգձգում է այդ ծրագրերի հաստատումը, որ գոնե հասցնեն ամառվա սեզոնին այդ աշխատանքները կատարեն, որպեսզի հարկ վճարող քաղաքացիները իրենց մեքենաները չկոտրեն քարուքանդ ճանապարհներին և իրենց էլ ավելի երջանիկ զգան այս ինքնիշխան պետությունում։
Այդպիսի ծրագրեր ներկայացրել են, օրինակ, Կոտայքի մարզի Աբովյան և Չարենցավան քաղաքները, նաև այլ մարզերի տարբեր համայնքներ։ Այսօր կառավարության նիստից հետո Կոտայքի մարզպետ Ահարոն Սահակյանից MediaHub-ը հետաքրքրվեց, թե ո՞րն է սուբվենցիոն ծրագրերը չհաստատելու կամ ձգձգելու պատճառը։
«Ես կարծում եմ, որ կհասցնեն դեռ հաստատել, որոշ ծրագրեր արդեն իսկ հաստատված են, նման խնդիր չի կարող լինել»,- ասաց Ահարոն Սահակյանը։
-Դուք ասում եք՝ չի կարող լինել, բայց կա նման խնդիր։
-Կարա ձգձգվի, բայց․․․
-Իսկ ինչո՞ւ է ձգձգվում, տեղյա՞կ եք։
-Ոչ։ Քննարկման փուլում է, նորմալ պրոցես է, նորմալ ընթացակարգ է, կհասցնենք, համենայնդեպս։
-Հիմա նույն Աբովյան ու Չարենցավան քաղաքներում մեծ փողոցներ պետք է կապիտալ նորոգեն սուբվենցիոն ծրագրերով, բայց կառավարությունը չի հաստատում։
-Կառավարությունը ոչ թե չի հաստատում, այլ քննարկման փուլում է, նորմալ է, մինչև հունիս-հուլիս կարող ենք անել։
-Ուշ չի՞ լինի, որովհետև ասում են՝ կարող է ընդհուպ օգոստոսին նոր հաստատեն, ինչը նշանակում է, որ կմնա մյուս տարի արդեն։
-Ինչը կհասցնեն՝ էս տարի կանեն, ինչը չեն հասցնի, մյուս տարի կանեն, տենց մեծ տրագեդիա չկա։
-Չէ, տրագեդիա կա, որովհետև, եթե պետք է մարդկանց կյանքը լավացնեք, որ հարկ վճարողները իրենց երջանիկ զգան, հիմա դուք հետաձգում եք այդ հարցը։
-Չենք հետաձգում, ևս մեկ անգամ կրկնում եմ՝ քննարկման փուլում է, կհասցնենք էն ժամանակ, երբ որ կհասցնենք։
Մանրամասն՝ տեսանյութում
Վահե Մակարյան