Երեկ հայտարարվեց՝ սեպտեմբերի 1-ից սկսված Երևանի դպրոցներում դասապրոցեսը սկսվելու է 8:15-ին, նախկին 8:30-ի փոխարեն։ Այս որոշումը մեծ վրդովմունքի ալիք է բարձրացրել։
Ֆեյսբուք սոցիալական ցանցի դպրոցական շատ խմբերում ծնողներն իրենց մտահոգությունն են հայտնում՝ նշելով, որ ամառային արձակուրդից հետո երեխանները ինչպե՞ս են կարողանալու վաղ արթնանալ։ Մեկ այլ խնդիր ևս բարձրաձայնում են՝ երբ դպրոցը հեռու է, այդ պարագայում երեխան ստիպված է շատ ավելի վաղ արթնանալ ու ավելի շուտ դուրս գալ տանից՝ դասից չուշանալու համար։
«Իմ համար նոր խնդիրներ է առաջացնում այս որոշումը։ 3 ամսվա ուշ արթնանալուց հետո երեխան ո՞նց այդքան շուտ արթնանա։ Սա դեռ մի կողմ, բա ձմռանը ի՞նչ ենք անելու՝ դեռ մութ է այդ ժամին, մութ և ցուրտ»,- MediaHub-ի հետ զրույցում իր մտահոգությունն է հայտնում դպրոցահասակ երեխայի ծնողը։
Նրա խոսքով՝ Երևանի քաղաքապետարանի այս որոշումը երեխային անհարմարություն պատճառելուց բացի, խնդիր է առաջանցում նաև աշխատող ծնողների համար։
«Բոլորիս գրաֆիկը խառնվեց սենց, իմ աշխատանքը 10։00-ից ա սկսվում, մեր տնից դպրոց 15 րոպե ա տևում, իսկ դպրոցից աշխատանքի վայր՝ 10 րոպե, ես ստիպված եմ շուտ հասնել աշխատանքի, երբ դռները դեռ փակ են, չգիտեմ, ո՞նց եմ անելու»,- մտահոգվում է ծնողը։
Նա վստահ է՝ եթե նպատակը երթևեկությունը թեթևացնելն է, ապա դա ոչ մի դեր չի խաղալու, քանի որ նույն հոսքը պահպանվելու է:
Կրթության փորձագետները ևս, հաստատելով ծնողների հայտնած մտահոգությունները, միևնույն ժամանակ հավելում են, որ այս որոշումը կարող է առաջացնել նաև մի շարք հոգեբանական խնդիրներ։
MediaHub-ի հետ զրույցում հոգեբան Միհրդատ Մադաթյանը նշեց, որ և՛ ֆիզիոլոգիական, և՛ հոգեբանական առումով դա լավ ազդեցություն ունենալ չի կարող։
«Քառորդային հատվածը հետաքրքիր չի երեխայի համար, որովհետև նրանք լավ չեն ընկալում այդ ժամին կատարվածը։ Նույնիսկ 08:30-ը ցանկալի չէ, նախընտրելի է կլոր ժամին դրված լինի դասաժամի սկսվելը»,- նշեց մեր զրուցակիցը։
Մասնագետը պնդում է, որ 08:15-ը խնդրահարույց ժամ է, և ելնելով այսօրվա Երևանում ստեղծված իրավիճակից՝ այս որոշումը նույնպես անօգուտ կլինի։
Հոգեբանի համոզմամբ՝ սեպտեմբերի 1-ից մենք կաթվածահար քաղաք ենք ունենալու և համատարած դասից ուշացող երեխաներ։
Էմմա Մարտիրոսյան