«Ժողովուրդ» օրաթերթը գրում է.
««Ժողովուրդ» օրաթերթի բացառիկ տեղեկությունների համաձայն՝ Հակակոռուպցիոն կոմիտե է հրավիրվել եւ հարցաքննվել Էջմիածնի նախկին քաղաքապետ Դիանա Գասպարյանը։
Մայիսի 15-ին Էջմիածնի ՔՊ-ական քաղաքապետ Դիանա Գասպարյանը հայտնեց, որ հրաժարական է տալիս։ Կուսակիցները նրա հրաժարականի պատճառների մասին մինչեւ օրս չեն խոսում՝ նշելով, որ Գասպարյանի ներկայացրած պարզաբանումներին ավելացնելու ոչինչ չունեն:
37-ամյա Դիանա Գասպարյանը, որի ընտանիքի անդամները նրա պաշտոնավարման ընթացքում աղմկահարույց տարբեր պատմություններում էին հայտնվել, որոշեց հրաժարական տալ՝ պատճառաբանելով, թե 7 տարվա պաշտոնավարումից հետո որոշել է ժամանակն այսուհետեւ նվիրել ընտանիքին:
Մինչ քաղաքապետ Գասպարյանը հրաժարականի պատճառների մասին է խոսում, Հակակոռուպցիոն կոմիտեն գործի է անցել, ու առաջիկայում Էջմիածնի քաղաքապետ Դիանա Գասպարյանի ընտանիքի շուրջ աղմկահարույց գործընթացներ են սկսվելու։
Իսկ ինչ գործընթացների ու մեղադրանքների մասին է խոսքը, եւ առհասարակ ինչ վարույթով է Հակակոռուպցիոն կոմիտեն մտնում Գասպարյանի տուն։
«Ժողովուրդ» օրաթերթին հայտնի դարձավ, որ 2024 թվականին Կոռուպցիայի կանխարգելման հանձնաժողովը, ուսումնասիրելով «Հետք»-ի՝ «Դիանա Գասպարյանի սկեսուրն Էջմիածնում ապօրինի շինարարություն է սկսել» վերնագրով հոդվածը, նյութերն ուղարկել է Գլխավոր դատախազություն, որի հիման վրա նախաձեռնվել է քրեական վարույթ: Գլխավոր դատախազությունից հաստատել էին քրեական վարույթ նախաձեռնելու փաստը եւ հայտնել, որ այն միացվել է «Հետք»-ի նույն հրապարակման հիման վրա ավելի վաղ հարուցված վարույթին:
Նշենք, որ Հակակոռուպցիոն կոմիտեում է քննվում պաշտոնատար անձի կողմից իշխանական կամ ծառայողական լիազորությունները չարաշահելու, ինչպես նաեւ հայտարարագրում կեղծ տվյալներ ներկայացնելու կամ տվյալները թաքցնելու դրվագներով նախաձեռնված քրեական վարույթը»։
«Իրավունք» թերթը գրում է.
«Արցախցիները հուլիսի 12-ին կայանալիք հավաքին պատրաստվում են բարձրաձայնել ոչ միայն իրենց սոցիալական խնդիրների մասին, այլ նաեւ իրենց մտահոգությունը ու աջակցությունը հայտնել եկեղեցուն։
Ասում են` Փաշինյանը բավականին վախեցած է արցախցիների ակտիվությունից։ «Դրանք կորցնելու բան չունեն, ամեն այլանդակության պատրաստ են»,- ասում են` ասել է Փաշինյանը։
Ուժայիներին հանձնարարել է. «Ալավ արեք, դրանց ակտիվությունը բնում խեղդեք»։
«Հրապարակ» թերթը գրել է․
Սրբազանի «հեղաշրջման» գործով պատգամավոր Արթուր Սարգսյանին անձեռնմխելիությունից զրկելու եւ կալանքի տանելու գլխավոր դատախազի միջնորդության քննարկման ժամանակ մի ուշագրավ դրվագ եղավ, որը վկայեց, որ գլխավոր դատախազն ընդամենը Փաշինյանի հանձնարարականն է կատարել` թքած ունենալով օրինականության անգամ ձեւական ընթացակարգերի վրա։
Երբ խորհրդարանում 2 օր անընդմեջ քննարկվում էր Սարգսյանին անձեռնմխելիությունից զրկելու միջնորդագիրը, դրան պետք է հաջորդեր կալանքի տանելու միջնորդությունը: Բայց ՔՊ-ականները նիստերի դահլիճում` գլխավոր դատախազի ներկայությամբ որոշեցին, որ պետք է քվեարկություն անցկացնեն ոչ միայն քննարկված, այսինքն՝ անձեռնմխելիությունից զրկելու հարցով, այլեւ՝ դեռ չքննարկված՝ կալանքի հարցով։
Այդ մասին հայտարարվեց ամբիոնից, գլխավոր դատախազն էլ, առանց դեմքի միմիկան փոխելու, հետեւում էր իրավական աբսուրդին, երեւի մտածում էր` թող ափալ-թափալ քվեարկեն, րոպե առաջ ազատվի այդ խայտառակությանը մասնակցելուց:
Միայն ՔՊ-ից վտարված Հովիկ Աղազարյանը նկատեց՝ ինչպե՞ս են 2 քվեարկությունները միաժամանակ անելու, գուցե խորհրդարանը չի՞ տալիս համաձայնություն՝ անձեռնմխելիությունից զրկելու, այդ դեպքում անիմաստ է դառնում կալանքի միջնորդությունը քննելը, առավել եւս՝ քվեարկելը:
Աղազարյանն ակնարկեց՝ ամեն ինչ նախօրոք որոշվա՞ծ է, որ մեկ քննարկումով ու մեկ քվեարկությամբ եք անում։ Ռուբեն Ռուբինյանը, ապա եւ դատախազը, ստիպված էին համաձայնել Աղազարյանի դիտողության եւ առաջարկի հետ։