Ինչպես արդեն նշել էինք՝ արցախցիները վաղը՝ հուլիսի 12-ին, մեծ հանրահավաք են անցկացնելու, որը տեղի կունենա Ազատության հրապարակում ժամը 18:00–ին։ Հանրահավաքի անցկացման պատճառները շատ են, մասնավորապես, արցախցիների բնակարանային խնդիրները, արցախցիների իրավունքների պաշտպանությունը, պայքար սեփական հայրենիքում արժանապատիվ ապրելու համար։
MediaHub-ն ավելի վաղ գրել էր, որ մեր տեղեկություններով՝ հանրահավաքին չի մասնակցելու Արցախի նախագահ Սամվել Շահրամանյանը, ում լիազորությունների ժամկետը լրացել է։ Այս պահին Արցախի նախագահի պարտականությունները կատարում է Արցախի ԱԺ նորընտիր նախագահ Աշոտ Դանիելյանը։
Դեռ մեկ ամիս առաջ պետք է տեղի ունենար Արցախի նախագահի ընտրությունը, սակայն, գործընթացը կանգ է առել, և այդպես էլ նախագահ չընտրվեց։
Ե՞րբ ԱԺ-ն կընտրի Արցախի նոր նախագահ, ի՞նչ օրակարգ է լինելու վաղը հանրահավաքին․ MediaHub-ն այս և այլ հարցերի շուրջ զրուցեց Արցախի խորհրդարանի «Արդարություն» խմբակցության պատգամավոր Մետաքսե Հակոբյանի հետ։
«Մի քանի օր առաջ լսումներ ունեինք Արցախի ներկայացուցչությունում, որին մասնակցում էին նաև մեր գործընկերները՝ ՀՀ ԱԺ ընդդիմադիր երկու խմբակցություններից, լսումների ժամանակ Արցախցիների պաշտպանության խորհրդի անդամները ներկայացրեցին հաշվետվություն, թե ի՞նչ է տեղի ունեցել այս ամիսներին, իրենց առաջարկները, ՀՀ իշխանությունների դիրքավորումն այդ առաջարկների վերաբերյալ։ Իրենք փաստեցին, որ որևէ էական փոփոխություն չի գրանցվել։ Այսինքն, այն խոստումնները, որ տվել էին ՀՀ իշխանությունները, չեն պահել, նույնիսկ սոցիալական հարթակում։ Պետք էր արձագանք, ըստ խորհրդի՝ լավագույն արձագանքը հանրահավաքն է արդեն հստակ դիրքորոշմամբ, պահանջների հետևից գնալու պատրաստակամությամբ»,- նշեց Հակոբյանը։
Խորհուրդը դիմել է Երևանի քաղաքապետարան, որ ըստ խորհրդի ներկայացրած ծրագրի՝ պետք է լինի և՛ հանրահավաք, և՛ երթ, և՛ նստացույց։
«Քաղաքապետարանը թույլ չի տվել իրացնել քաղաքացիների սահմանադրական իրավունքը՝ խաղաղ երթ և նստացույց, դրանով պայմանավորված այս պահին հստակ որոշում չկա անելիքների մասով, քանի որ այն ծրագիրը, որն ուներ խորհուրդը, թույլ չեն տալիս այս իշխանությունները իրացնել, նույնիսկ խաղաղ երթ իրականացնելը։ Այս պահին քննարկման փուլում են. եթե ամիսներ առաջ խորհուրդն ուներ այլ հույսեր իշխանությունների մոտեցման հետ կապված, հույս ունեին, որ ՀՀ իշխանությունները կլսեն, ինչ-որ տեղ ընդառաջ կգնան, բայց այս ամիսների ընթացքում համոզվեցին, որ չկա»,- նշեց Հակոբյանը։
Հարցին, թե արդյո՞ք հանրահավաքին կմասնակցի Արցախի ԱԺ նորընտիր նախագահը, Հակոբյանը պատասխանեց․ «Այսպիսի իրավիճակներում, երբ ժողովուրդն է կազմակերպում կամ ժողովուրդն ուզում է իր ձայնը լսելի դարձնի, երբեք ժողովրդից անջատ չենք եղել և այս անգամ ևս»։
Արցախի նախագահի ընտրությունների մասով էլ Մետաքսե Հակոբյանը պատասխանեց․ «ԱԺ–ն կարճ քաղաքական հայտարարություն տարածեց այն ֆորսմաժորային իրավիճակի մասին, որում հայտնվել ենք, սկսած օկուպացիայից, երբ իշխանությունները մեզ դիտարկում են բառից բուն իմաստով իրենց անձնական թշնամին և թշնամաբար են վերաբերվում։ Իրենք հայտարարեցին, թե լարված իրավիճակում, ցանկացած վատ իրավիճակի դեպքում պատճառը լինելու են այս ընտրությունները։ Իհարկե, իրենց այս խոսքերը լուրջ չենք կարող ընդունել, բայց 2021-ին Հայաստանի սուվերեն տարածքների զավթումն Ադրբեջանի կողմից դա զուտ իրենց գործուներության արդյունքում էր։ Մենք երբևէ չենք պատրաստվել, չենք պատրաստվում վնասել Հայաստանին, ոչ թե մենք վախեցել ենք կամ բռնաճնշումները, որոնց ենթարկվում ենք ժամանակ առ ժամանակ, մեզ հետքայլ է արել՝ ո՛չ, բնավ։ Պահպանված է Արցախի նախագահի իստիտուտը, այս պահին Արցախի ԱԺ նախագահը կատարում է Արցախի նախագահի լիազորությունները, իսկ տեղակալը կատարում Արցախի ԱԺ նախագահի լիազորությունները»։
Նա նշեց, որ այս օրակարգի մեջ լինելով, երբ իրենց գործընկեր Դավիթ Գալստյանը ձերբակալված է, չեն դադարում քաղաքական կոնսուլտացիաները․ «Որպես ավելի փոքր խմբակցություն առաջարկ ենք արել, որ քաղաքականության բարոյականության տեսանկյունից նպատակահարմար ենք գտնում, որ մեծ խմբակցությունները պիտի թեկնածու առաջադրեն, կամ հայտարարեն, որ չունեն թեկնածու և այդ դեպքում պատրաստ են քննարկել այլ խմբակցությունների առաջադրած թեկնածությունը»։
Ամփոփելով՝ Հակոբյանը նշեց, որ մոտ ապագայում անպայման կլինեն Արցախի նախագահի ընտրություններ։
Մարիաննա Արամյան