Երևանի ավագանու «Մայր Հայաստան» խմբակցության անդամները երեկվանից կոչ են անում վարորդներին «կարմիր գծերի» համար սահմանված գումարը, որը քաղաքային իշխանությունների թեթև ձեռքով դարձել է տարեկան 160 հազար դրամ, չվճարել, քանի որ 2025 թվականի համար Երևանի ավագանու կողմից սահմանված «կարմիր գծերի» թանկացմանը վերաբերող դրույթները դատարանի կողմից անվավեր են ճանաչվել։
Երևանի քաղաքապետի մամուլի խոսնակ Հայկ Կոստանյանն էլ գրառում է կատարել՝ նշելով, որ «Մայր Հայաստան» խմբակցության ավագանու որոշ ներկայացուցիչներ, ինչպես նաև որոշ լրատվամիջոցներ, հանդես են եկել հայտարարություններով և հրապարակումներով, որոնք կարող են քաղաքացիներին մոլորության մեջ գցել՝ տպավորություն ստեղծելով, թե քաղաքում վճարովի կայանատեղիների գործող կարգը այլևս ուժը կորցրել է և կարելի կայանման համար չվճարել։
«Տեղեկացնում եմ, որ նշված ինֆորմացիան իրականությանը չի համապատասխանում, և գործող կարգը շարունակում է ուժի մեջ մնալ»,- գրել է Կոստանյանը։
MediaHub-ը հետաքրքրվեց Կոստանյանից, թե արդյոք իր գրառումից կարո՞ղ ենք եզրակացնել, որ Երևանի քաղաքապետարանը չի պատրաստվում կատարել դատարանի վճիռը։
«Դատարանի որոշման մեջ կա նաև մի շատ կարևոր դրույթ, որի մասին հրապարակային չի ասվում, այն է՝ որոշումն օրինական ուժի մեջ է մտնում հրապարակման պահից մեկ ամիս հետո, և մինչև օրինական ուժի մեջ մտնելու համար սահմանված ժամկետը կարող է բողոքարկվել վերաքննության կարգով ՀՀ վերաքննիչ վարչական դատարան։ Այսինքն՝ մայիսի 23-ին դատարանն ընդունել է այս որոշումը, ասել է՝ այս որոշումն ուժի մեջ է մտնելու մեկ ամիս հետո, այսինքն՝ բողոքարկելու համար դատարանը տալիս է մեկ ամիս ժամկետ։ Հետևաբար, քանի դեռ այդ ժամմետը չի լրացել, մարդկանց ասել՝ ժողովուրդ ջան, մի՛ վճարեք, դա ակնհայտ մարդկանց մոլորեցնելու քաղաքականություն է հետապնդում։ Որովհետև հիմա, օրինակ, Դուք՝ Վահե ջան, որքան գիտեմ՝ մեքենա ունեք, գնաք մի տեղ կանգնեք ու չվճարեք՝ լսելով «Մայր Հայաստան» խմբակցության անդամների կոչը, և հետո տուգանվեք այդ ընթացքում, ի՞նչ եք անելու, «Մայր Հայաստան» ավագանու անդամներին խնդրելու եք, որ Ձեր տուգանքը վճարե՞ն, քանի որ դատական ակտը վերջնական ուժի մեջ մտած չի»,- ասաց Կոստանյանը՝ նշելով, որ երբ ակտը վերջնական ուժի մեջ կմտնի, նոր քաղաքացիները կկարողանան չվճարել։
Իսկ պատրաստվո՞ւմ են բողոքարկել դատարանի որոշումը, Հայկ Կոստանյանը դրական պատասխան տվեց։ «Իհարկե, սահմանված ժամկետում բողոքարկվելու է, քանի որ մենք ունենք մեր դիրքորոշումը, «Մայր Հայաստանն» ունի իր դիրքորոշումը, դատարանը՝ իր, և այս երեք դիրքորոշումները վերջնական պետք է հանգուցալուծվեն դատարանի վճռով»,- ասաց քաղաքապետարանի մամուլի պատասխանատուն։
Վահե Մակարյան