«Հրապարակ» թերթը գրում է.

«Երեկ առավոտյան տեղեկացանք, որ ադրբեջանցիները մտել են Սիսիանի Բնունիս համայնք, թակել Գասպարյանների դուռը: Սիսիանի ոստիկանները հաստատեցին լուրը, սակայն ողջ օրը իրավապահները լռեցին, եւ պարզ չդարձավ, թե ինչպես են նրանք շրջանցել մեր սահմանապահներին, եղե՞լ են սահմանապահներ։ Ադրբեջանցիները 3-ն են եղել՝ զինվորական հագուստով։ Դուռը բացել է տիկին Շողիկը, ով կասկածել է ու ահազանգել ոստիկանություն։ Նա մեզ ասաց․ «․․․ո՞վ չէր վախենա, այո, վախեցել եմ … բան չխոսացին, բայց ամեն ինչ պարզ էր»։

Ավելի ուշ մեկ այլ բնակավայրում՝ Աշոտավանում, իրավապահները բռնել են ադրբեջանցիներից մեկին, տարել ոստիկանության Սիսիանի բաժին, մյուս երկուսը փախել են։ Ադրբեջանցին Աշոտավանում եւս այցելել է մի քանի տուն, զրուցել բնակիչների հետ: Ասել է, որ 3 օր է՝ Հայաստանում է, թաքնվել է անտառներում։

Մեր հարցին, թե ճի՞շտ է, որ երկուսը փախել են, ոստիկանության Սիսիանի բաժնից ասացին․ «Ո՞վ ասաց, որ 3-ն  են եղել, միգուցե 6-ն են, մանրամասներ չենք կարող հաղորդել»։ Ոստիկանությունում ադրբեջանցին ասել է, թե տարածքը շփոթել է: Նրան փոխանցել են ԱԱԾ-ին։

Ուշագրավ է, որ ադրբեջանցիները Բնունիսում թակել են 44-օրյա պատերազմում զոհված Գոռ Գասպարյանի տան դուռը, ում տուն ընդամենը մեկ ամիս առաջ, դստեր հետ, այցելել էր վարչապետի կինը` Աննա Հակոբյանը։ Համայնքում կատարվածը զուտ պատահականություն չեն համարում` տարբեր վարկածներ են քննարկում»:

«Հրապարակ» թերթը գրում է.

«ՀՀ առողջապահության նախկին փոխնախարար, Երեւանի փոխքաղաքապետ Գեւորգ Սիմոնյանին կալանավորելու որոշման դեմ բողոքը երեկ քննվել է Վերաքննիչ քրեական դատարանում, սակայն որոշում չի կայացվել։ Դատարանը բավարարել է մեղադրվող կողմի միջնորդությունը եւ նախապես նշանակած գրավոր քննությունը փոխել է բանավորի, ինչը նշանակում է, որ Գեւորգ Սիմոնյանը ներկա է գտնվելու նիստին եւ հայտարարություններ է անելու: Գրավոր ընթացակարգի դեպքում մեղադրյալի մասնակցությունը պարտադիր չէ։

Հիշեցնենք․ նա կալանավորվել էր մարտի 12-ին: Սիմոնյանը մեղադրվում է 2020-2022թթ. ընթացքում առողջապահության նախարարի տեղակալի պաշտոնը չարաշահելու եւ քովիդի դեմ պայքարի համար նախատեսված միջոցների ծախսման նկատմամբ պատշաճ հսկողություն չիրականացնելու համար:

Այս գործի թելերը տանում են դեպի առողջապահության ներկա եւ նախկին նախարարներ, քովիդի պարետ, սակայն Փաշինյանը հանձնարարել է բացահայտումների շղթան կտրել եւ առայժմ բավարարվել փոխքաղաքապետով»:

«Ժողովուրդ» օրաթերթը գրում է.

ՀՀ վարչական դատարանի դատավորները մեկը մյուսի հետեւից վերադարձրել են «Քաղաքացիական պայմանագիր» կուսակցության հայցերը:

Ինչպես հայտնի է, Սիսիանում համայնքապետի ընտրություններից հետո «Քաղաքացիական պայմանագիր» կուսակցությունը դատի էր տվել «Հայաստան» խմբակցության պատգամավոր Արթուր Սարգսյանին, ինչպես նաեւ «Քաղաքացու որոշում» կուսակցության քաղաքապետի թեկնածու Ավագ Ասատրյանին, ՔՈ անդամ Վարդան Բալյանին, եւ դատարանից պահանջում էին, որ ստիպի ԱԺ պատգամավորին եւ մյուս անձանց Վարչական իրավախախտումների մասին ՀՀ օրենսգրքի 40.1 հոդվածով նախատեսված կարգով վարչական պատասխանատվության ենթարկել:

Իսկ ի՞նչ են արել վերոնշյալ անձինք, որ նրանց ՔՊ-ն հասցրել է դատարանի դռները:

«Ժողովուրդ» օրաթերթին հայտնի դարձավ, որ ՔՊ-ն նրանց մեղադրում է լռության օրը հակաքարոզչություն անելու համար: Արդյունքում դատարանը բոլոր հայցերը հետ է վերադարձրել, որտեղ թերություններ են եղել:

«Ժողովուրդ» օրաթերթը գրում է.

Վաղը ՀՀ ԱԺ-ն կքննարկի «Հայաստան» խմբակցության պատգամավոր Մհեր Սահակյանի նկատմամբ հանրային հետապնդում հարուցելու դատախազության միջնորդությունը. ՀՀ գլխավոր դատախազ Աննա Վարդապետյանը կներկայացնի:

Համաձայն «ԱԺ կանոնակարգ» օրենքի՝ պատգամավորի նկատմամբ քրեական հետապնդում հարուցելուն կամ նրան ազատությունից զրկելուն համաձայնություն տալու մասին Ազգային ժողովի որոշումն ընդունվում է գաղտնի քվեարկությամբ՝ ձայների մեծամասնությամբ, այսինքն՝ 71 պատգամավոր ունեցող ՔՊ-ն միայնակ կարող է հավանություն տալ միջնորդությանը:

«Ժողովուրդ» օրաթերթի տեղեկություններով՝ ՔՊ-ն Մհեր Սահակյանի մասով միասնական որոշում ունի, ինչպես Սեյրան Օհանյանի ու Արմեն Չարչյանի դեպքում էր. կգան եւ համաձայնություն կտան ընդդիմադիր պատգամավորի նկատմամբ քրեական հետապնդում հարուցելու միջնորդությանը:

Ընդ որում՝ եթե Օհանյանի ու Չարչյանի դեպքում իշխող ֆրակցիայի ներսում տարաձայնություններ եղել են, ապա Մհեր Սահակյանի դեպքում իշխանականներն ավելի «մարտական» են տրամադրված: Ի դեպ, ընդդիմությունը եւս մասնակցելու է նիստին եւ օգտագործելու է ՔՊ-ականների մասնակցությամբ աղմկահարույց միջադեպերի ողջ «զինանոցը»:

ՔՊ-ն խոցելի վիճակում է գտնվում հիմա՝ կուսակցականների վերջին պահվածքի ֆոնին:

«Ժողովուրդ» օրաթերթը գրում է.

Այսօրվանից մեկնարկում են ԱԺ նոր նստաշրջանի աշխատանքները:
ԱԺ այս նստաշրջանը խոստանում է թեժ լինել. թերեւս ամենաէպիկը ընդդիմադիր պատգամավոր Մհեր Սահակյանին անձեռնմխելիությունից զրկելու հարցն է, որը ԱԺ վաղվա նիստում ընդգրկված երկրորդ հարցն է: Բացի սա, այս նստաշրջանում վերջապես խորհրդարանը ՀՀ մարդու իրավունքների պաշտպան է ընտրելու:

ՄԻՊ-ի հարցը կքննարկվի հենց նիստի սկզբում՝ որպես առաջին հարց: Հիշեցնենք, որ ՄԻՊ պաշտոնում Ազգային ժողովի մարդու իրավունքների պաշտպանության եւ հանրային հարցերի մշտական հանձնաժողովը առաջարկել է Անահիտ Արտյոմի Մանասյանի թեկնածությունը:

Ըստ «ԱԺ կանոնակարգ» օրենքի՝ Մարդու իրավունքների պաշտպանն ընտրվում է գաղտնի քվեարկությամբ, պատգամավորների ընդհանուր թվի ձայների առնվազն երեք հինգերորդով: Հավելենք, որ խորհրդարանականները այս նստաշրջանի ընթացքում պետք է նաեւ դատավորներ, Հանրային ծառայությունները կարգավորող հանձնաժողովի եւ Կոռուպցիայի կանխարգելման հանձնաժողովի անդամներ ընտրեն:

«Փաստ» օրաթերթը գրում է

Նիկոլ Փաշինյանի իշխանությունն, այնուամենայնիվ, որոշել է «քրեական հետապնդում» իրականացնել ԱԺ ընդդիմադիր պատգամավոր Մհեր Սահակյանի նկատմամբ՝ իշխանական պատգամավոր Վլադիմիր Վարդանյանի ու նրա միջև տեղի ունեցած միջադեպի պատրվակով: Ավելի վաղ արդեն առիթ ենք ունեցել նշելու, որ Մհեր Սահակյանի, ավելի ճիշտ՝ նշված միջադեպի հետ կապված «ընթացք տալու» թեման Նիկոլ Փաշինյանի ՔՊ-ում քննարկումների առարկա է դարձել: Եվ չնայած մի շարք քպականներ «նեղ շրջանակում» կողմ են եղել, որ քրեական հետապնդում իրականացնելու համար «իրենց» դատախազը ԱԺ մտնի միջնորդագրով, մի քանի այլ քպականներ ու Նիկոլ Փաշինյանը այնքան էլ ոգևորված չեն եղել այդ տարբերակով՝ լրացուցիչ ծանրության տակ չմտնելու և նորանոր հարվածներ չստանալու նկատառմամբ:

Տվյալ դեպքում դա անխուսափելի է, քանի որ իրենք՝ քպականները, ամենատարբեր հանգամանքներում ինքնադրսևորվել են քրեորեն պատժելի զանազան արարքներով, ու դա մեկ կամ երկու դեպք չէ: Ամեն պարագայում, երկուշաբթին եկավ այս հարցում որոշ հստակություն մտցնելու՝ ի դեմս տարածված հաղորդագրության, որ Հայաստանի գլխավոր դատախազ Աննա Վարդապետյանը ապրիլի 10-ին ՀՀ ԱԺ նախագահին է ներկայացրել ԱԺ պատգամավոր Մհեր Սահակյանի նկատմամբ հանրային քրեական հետապնդում հարուցելուն համաձայնություն տալու մասին միջնորդագիր: Դրան կցվել է նաև պատգամավորի նկատմամբ հանրային քրեական հետապնդում հարուցելուն համաձայնություն տալու մասին Ազգային ժողովի որոշման նախագիծ:

Այսինքն, ՔՊ-ում, այնուամենայնիվ, որոշել են, որ «մինչև վերջ» պիտի գնան, իրենցից մեկին հարվածած ընդդիմադիր պատգամավորին պիտի «մինչև վերջ» հետապնդեն, գլուխը քարը՝ թե քպականներն իրենց «մինչև վերջ» խայտառակվելու ճանապարհին էլի մի քանի խոշոր քայլ չեն անի: Ըստ դատախազության տարածած վարկածի, ի դեպ, հերքվել է հարված ստացած քպականի հայտարարությունը, թե իրեն «ինչ-որ առարկայով» են խփել: Չնայած, պաշտոնական վարկածից էլի միակողմանի քննության հոտ է գալիս: Ըստ այնմ՝ «...Մ.Ս.-ն ձեռքով հարվածել է սեղանին, ոտքի կանգնել, բղավելով դիտողություն արել հանձնաժողովի նախագահին, փակ քննարկման բնականոն աշխատանքը խոչընդոտելու դիտավորությամբ շրջանցել է իր և Վ.Վ.-ի միջև նստած պատգամավոր Ա.Ղ.-ին, մոտեցել հանձնաժողովի նախագահին և աջ ձեռքով դիտավորությամբ հարվածել նրա դեմքի ձախ քունքային շրջանին:

Հարվածի հետևանքով հանձնաժողովի նախագահի առողջությանը պատճառվել է թեթև վնաս՝ առողջության կարճատև քայքայումով՝ ձախ վերհոնքային շրջանի պատռված վերքի, ձախ վերհոնքային, քթի մեջքի քերծվածքների, ձախ վերին և ստորին կոպերի արյունազեղումների ձևով»: Հավելենք, որ պատգամավոր Մհեր Սահակյանի իրավունքների պաշտպանությունն ստանձնած Ռուբեն Մելիքյանը ևս երեկ արձագանքեց դատախազության տարածած հաղորդագրությանը: Նա սոցցանցային իր էջում մասնավորապես նշել է. «...5) Մեր մոտեցումն անփոփոխ է. Սահակյանի արարքում խուլիգանությունը (որպես օբյեկտիվ երևույթ) և խուլիգանական դրդումը (որպես սուբյեկտիվ երևույթ) իսպառ բացակայում է, իսկ հարվածը հասցվել է անհրաժեշտ պաշտպանության նկատառումով»։

Ինչ էլ ասվի, սա ծայրեծայր քաղաքական գործ է: Հասկանալի է՝ երկու պատգամավորների միջև տեղի ունեցած միջադեպի քրեաիրավական նրբությունների ու մանրամասնությունների մասին պրոֆեսիոնալ իրավաբանները դեռ շատ հայտարարություններ կանեն: Ավելին, քմահաճույքներով և օրինականության վրա թքածունենալու մոտեցումներով առաջնորդվող իշխանությունն այս դեպքում ստիպված է լինելու գոնե ինչ-որ մակարդակի համապատասխանել՝ հաշվի առնելով, որ իրավական դաշտում գործ են ունենալու Ռուբեն Մելիքյանի նման բարձրակարգ և սկզբունքային մասնագետի հետ:

Ամեն դեպքում, կրկնենք՝ այս գործը քաղաքական է, իսկ այն, ինչ փորձ է արվելու անել բացահայտորեն կողմնակալ գլխավոր դատախազի ու նրա միջնորդագրի միջոցով, ուղղակիորեն քաղաքական հետապնդում է, առնվազն՝ քրեական իրավունքի կամայական կիրառում, կուսակցական խտրականության դրսևորում: Տեսեք, դատախազությունը ԱԺ նախագահին դիմել է միայն ԱԺ ընդդիմադիր պատգամավորի նկատմամբ քրեական հետապնդում հարուցելուն համաձայնություն տալու միջնորդությամբ: Դատախազությունը (երբ էլ եղած լինի, ով էլ եղած լինի գլխավոր դատախազը) չի դիմել իշխանական խմբակցության մի շարք անդամների նկատմամբ առնվազն նույն հոդվածով՝ «խուլիգանություն», նմանապես քրեական հետապնդում իրականացնելու համաձայնություն ստանալու համար: Իսկ այդպիսի դեպքերը քիչ չեն:

Ու ի՞նչ է ստացվում: Այսինք, երբ խուլիգանական դրսևորումներ են ունենում, որպես ՔՊ-ի հավաքական կերպարներ, վահագնալեքսանյանները, արթուրհովհաննիսյանները և նմանօրինակ այլ քպականներ, դատախազությունը «մոռանում է» օրենքի գոյության և այն կիրառելու մասին: Միգուցե միանգամից պետք է օրենք ընդունել, որ քպականները կարող են ԱԺ-ում հարվածել ում ուզեն, առհասարակ, քպականները կարող են «աքացիներ» տալ ընդդիմադիրներին, ՄԻՊ թեկնածուի հասցեին սպառնալիքներ հնչեցնել, ծանր հանցագործություններ անել, ինչ ուզեն՝ անեն, բայց նրանց ոչ մեկը ոչինչ չի ասի, դատախազը ոչ միայն նրանց քրեական պատասխանատվության ենթարկելու միջնորդագրերով ԱԺ չի մտնի, այլ հակառակը՝ կառնի իր պաշտպանության տակ: Բայց, այ, եթե հանկարծ ընդդիմադիր որևէ գործիչ փողոցն անցնի դրա համար չնախատեսված վայրով, ապա նրան պետք է տեղում գնդակահարել:

Իսկ քպականները, օրվա իշխանությանը ծառայողները կարող են համարձակորեն, օրինակ՝ մեքենայի տակ գցել՝ վրաերթի ենթարկել երիտասարդ հղի կնոջը՝ սպանելով նրան ու իր չծնված երեխային, ու ազատորեն շրջեն, վայելեն կյանքն ու ծիծաղեն բոլորի վրա: ՔՊ-ի դատախազը մատը մատին չի տա, բնականաբար: Դա, առհասարակ, կոչվում է «երկակի ստանդարտ», չնայած քպականների դեպքում ավելի տեղին կլինի «բազմակի ստանդարտ» բնորոշումը: Այսինքն, օրենքը կիրառվում է ընտրողական մոտեցմամբ, ասել կուզի՝ ոչ մի օրենք էլ չկա, պաշտոնապես հայտարարվում է, որ օրենքները ոչ մի բան են, այնպես որ, յուրաքանչյուրն ինչ ուզում է ու ի վիճակի է՝ կարող է անել: Ի՜նչ օրենք-մորենք: Ի դեպ, «երկակի ստանդարտները» դեռ ոչ մի իշխանության ոչ մի լավ տեղ չեն տարել:

Հ.Գ. - Մի ի դեպ էլ. տատիկներն ընդհանրապես իրենց հարուստ կենսափորձով մեծամասամբ իմաստուն են:

«Փաստ» օրաթերթը գրում է

Մեր տեղեկություններով, այս օրերին Եվրամիության խորհրդի նախագահ Շարլ Միշելը մի քանի հեռախոսազրույցներ է ունեցել (ավելի կոնկրետ՝ երեք) Նիկոլ Փաշինյանի և Իլհամ Ալիևի հետ։ Հեռախոսազրույցների հիմնական թեման վերաբերել է հայ-ադրբեջանական հարաբերություններին և բանակցային գործընթացին։

Հատկանշական է, որ Միշելն առանձնակի շահագրգռվածությամբ հետաքրքրվել է վերջին օրերին տեղի ունեցող զարգացումներով և սահմանային միջադեպերով։ Ինչպես փոխանցում է թերթի դիվանագիտական աղբյուրը, այս փուլում եվրոպացիներն ամեն կերպ ցանկանում են հայ-ադրբեջանական բանակցային գործընթացի առաջիկա հանդիպումն անցկացնել իրենց հովանու ներքո՝ մասնավորաբար, մեր տեղեկություններով, նրանք ցանկանում են առաջիկա շաբաթներին Փաշինյանին և Ալիևին տեսնել Բրյուսելում։

Այդուամենայնիվ, ըստ մեր տեղեկությունների, չնայած եվրոպական կողմի նման շահագրգռվածությանը, Փաշինյան-Ալիև առաջիկա հանդիպումը, որը, ըստ նախնական պայմանավորվածության, պետք է տեղի ունենա մայիսի երկրորդ կեսին, ամենայն հավանականությամբ կանցկացվի Վաշինգտոնում։ ԱԳՆ մեր աղբյուրը նաև հայտնում է, որ կողմերի մոտեցումներն կարծես թե համընկնում են՝ բանակցությունների հետագան տեսնել վաշինգտոնյան հարթակում. նշենք, որ հանդիպում անցկացնելու նախաձեռնությունը ԱՄՆ պետքարտուղար Էնթոնի Բլինքենինն է, որը նկատելիորեն ակտիվ է իր գործողություններում և խնդրի վերաբերյալ դրսևորած մոտեցումներում։