Հայաստանի և Բելառուսի արտաքին գործերի նախարարությունների միջև հեռակա բանավեճ է:
Պատճառը ՀԱՊԿ Հավաքական անվտանգության խորհրդի նիստի ժամանակ Ալեքսանդր Լուկաշենկոյի հայտարարությունն է այն մասին, որ ճիշտ չի ՀԱՊԿ-ը հակադրել Ադրբեջանին.
«Ադրբեջանն այժմ գլխավորում է բացարձակապես մեր մարդը՝ Իլհամ Ալիևը: Ինչ կլինի վաղը, չէ որ նա հավերժ չէ, ոչ մեկ չգիտի, ուստի այդ հարցերը պետք է լուծել հիմա»,- ասել էր Բելառուսի նախագահը՝ ընդգծելով, որ և՛ Ադրբեջանը, և՛ Հայաստանը Բելառուսի համար «հարազատ» երկրներ են, և հակամարտությունը երկու երկրների միջև պետք է կարգավորվի բացարձակապես խաղաղ ճանապարհով:
Բայց կարևորն այն է, որ Լուկաշենկոն, ըստ էության, արդարացրել է Իլհամ Ալիևին Ղարաբաղի խնդիրը պատերազմով լուծելու համար։ Նրա խոսքով՝ Լեռնային Ղարաբաղի հարցում Ադրբեջանին «անկյուն էին մղել, ուժային ճանապարհից բացի չթողնելով ուրիշ լուծում»։
Ինչպես ավելի վաղ MediaHub-ը գրել էր՝ ՀՀ ԱԳՆ խոսնակ Վահան Հունանյանը, անդրադառնալով Լուկաշենկոյի հայտարարություններին նշել էր, թե՝ «Բելառուսի նախագահի հախուռն, բանակցությունների տրամաբանությունից կտրված և ամենևին ոչ դաշնակցային֊գործընկերային հայտարարությունները, որոնք հարցականի տակ են դնում իր իսկ կողմից ՀԱՊԿ շրջանակներում ստորագրած անդամ-պետության պարտավորությունները, մեկնաբանելը տեղին չենք համարում»։
Մինսկի պատասխանը իրեն երկար սպասեցնել չտվեց. պատասխանեց Բելառուսի ԱԳՆ խոսնակ Անատոլի Գլազը.
«Բելառուսի նախագահ Ալեքսանդր Լուկաշենկոյի մոտեցումը հայ-ադրբեջանական հակամարտությանը հիմնված է իրականության վրա, այն հասկանալի է և ազնիվ դաշնակցային ազնիվ։ Հայաստանի ԱԳՆ-ն շատ օրիգինալ դիրքորոշում է որդեգրել, Բելառուսը պատմության ընթացքում ոչ թե խոսքով, այլ գործով հաստատել է իր հավատարմությունը դաշնակցային պարտավորություններին: Բելառուսի նախագահի հնչեցրած մոտեցումները ոչ թե կտրված են իրականությունից, այլ, հակառակը, հիմնված են իրականության վրա, հասկանալի են ու դաշնակցային տեսանկյունից ազնիվ»,- ասել է նա՝ հիշեցնելով, որ «բելառուսական կողմը հետեւողականորեն հանդես է եկել ղարաբաղյան հակամարտության խաղաղ կարգավորման օգտին՝ այդ նպատակով զգալի ջանքեր գործադրելով բոլոր հասանելի ձևաչափերով՝ ինչպես բազմակողմ, այնպես էլ երկկողմ»:
Մինչ դիվանագիտական լեզվով ՀԱՊԿ-ում և ԵԱՏՄ-ում դաշնակից երկրների ԱԳՆ-ները իրար կծմծում են, իրականությունը շարունակում է մնալ հենց մակերեսին՝ Ալեքսանդր Լուկաշենկոյի համար Բաքուն ու անձամբ Իլհամ Հեյդարիչը ավելի հարազատ, մտերիմ ու թանկ է, քան Երևանն ու դաշնակցային պարտավորությունները: Ինչի մասին «Բատկան», մեծ հաշվով, չի թաքցրել ու չի էլ թաքցնում՝ Իլհամի ձեռքից ստացած “Հեյդար Ալիևի” անվան շքանշանը վկա: