Այս իշխանության բերած «խաղաղության օրակարգը» պոպուլիզմի դրսևորում է։ Այդ մասին այսօր խորհրդարանում հայտարարեց ԱԺ «Հայաստան» խմբակցության պատգամավոր Մհեր Սահակյանը։
Պատգամավորի խոսքով՝ չկա մեկը, որ խաղաղություն չի ուզում, բայց այսօր այս իշխանությունը խաղաղության անվան տակ սուգ է բերում, քանդում է այն ամենն, ինչ ազգային է։
«Նրանք իրենց բոլոր ձախողումները ներկայացնում են որպես ձեռքբերում։ Դավաճանությունն էլ՝ հերոսություն։ Բոլորովին վերջերս իրեն քաղաքական մտքի տիտան համարող, բոլոր իշխանությունների հետ օգուտով գործակցության փորձ ունեցող երեսփոխանն այս ամբիոնից խոսում էր պետական շահից։ Ըստ նրա՝ Հայաստանի շահից է բխում Արցախն ու արցախցուն թշնամուն հանձնելը»,- նշեց պատգամավորը։
Նրա դիտարկմամբ՝ այդ նույն տեսակը ապագայում Սյունիքի, Վայոց ձորի ու Գեղարքունիքի մասին է հենց այդպես խոսելու։
«Շատ են եղել չէ՞ մեր պատմության մեջ դեպքեր, երբ թշնամու հետ փորձել են գործակցել ու խաբվել են։ Երբ պետք է հասկանաք, որ հայրենիքից մի հատված զիջելով, խաղաղություն չեք բերելու»,- նշեց նա։
Դեռ չէր ավարտել խոսքը պատգամավորը, երբ ԱԺ փոխխոսնակ Հակոբ Արշակյանը կոչ արեց ավարտել մահախոսականը։
Մանրամասները՝ տեսանյութում։