Քննչական կոմիտեին 670 հատ տեսաձայնագրման սարք կնվիրեն: Համապատասխան որոշումն ընդգրկված է կառավարության վաղվա նիստի օրակարգում։ Համաձայն նախագծի՝ «Փրիթի Ուեյ» սահմանափակ պատասխանատվության ընկերությունն իրեն սեփականության իրավունքով պատկանող 2023 թվականի արտադրության 83 080 000 դրամ ընդհանուր արժեքով 670 հատ «Spektre V7» մակնիշի կինոխցիկները (տեսաձայնագրման սարքերը) (այսուհետ՝ գույք) կնվիրաբերի Հայաստանի Հանրապետության քննչական կոմիտեին։

Նախագծի հիմնավորման մեջ նշված է, որ ՀՀ վարչապետի աշխատակազմ է դիմել ՀՀ քննչական կոմիտեի նախագահը՝ տեղեկացնելով, որ «Փրիթի Ուեյ» ՍՊԸ-ի հետ կնքել է տեսաձայնագրման սարքերի (կինոխցիկների) մատակարարման պայմանագիր, սակայն մատակարարման փուլում պարզվել է, որ տվյալ ապրանքը չի բավարարում տեխնիկական բնութագրի պահանջներին և չի ընդունվել, սակայն դրանք ժամանակավոր կերպով տրամադրվել է Կոմիտեին՝ ՀՀ քրեական դատավարության օրենսգրքով նախատեսված պարտադիր տեսաձայնագրման ենթակա քննչական գործողությունների մեկնարկն օրենսդրությամբ սահմանված ժամկետներում ապահովելու նկատառումներով։

Կոմիտեն նաև տեղեկացրել է, որ ներկա պահին «Փրիթի Ուեյ» ՍՊԸ-ի ղեկավար մարմինը կայացրել է համապատասխան որոշում և առաջարկում է տեխնիկական բնութագրին չհամապատասխանող տեսաձայնագրման սարքերից 670-ը՝ 83 080 000 ՀՀ դրամ արժեքով նվիրատվության կարգով հանձնել Կոմիտեին, որը կառուցվածքի շարունակական ընդլայնման և աշխատակազմի թվաքանակի ավելացման պարագայում կարող է ծառայել որպես այլընտրաքային տարբերակ և հետագայում զերծ կպահի նաև պետական բյուջեի հնարավոր ծանրաբեռնումից։

Նախագիծը չզեկուցվող է, ներկայացրել է տարածքային կառավարման և ենթակառուցվածքների նախարար Գնել Սանոսյանը։