ԱԱԾ նախկին տնօրեն Միքայել Համբարձումյանն անդրադարձել է "Հայաստան" դաշինքի ցուցակով թեկնածուների` պատգամավորական մանդատներից հրաժարվելու խնդրին.
Ակնհայտ է, որ հանրային ճանաչում ունեցող, ընդդիմադիր հայացքների տեր մարդիկ չեն ցանկանում ստանձնել թափուր մնացած պատգամավորական մանդատներն, աշխատել Ազգային ժողովում, գտնվել այդ մթնոլորտում, չեն հավատում դրա արդյունավետությանը, համարում են՝ անիմաստ:
Սա խոսում է այն մասին, որ խաթարված է ԱԺ հեղինակությունը, այնտեղ տիրում է անառողջ, միմյանց նկատմամբ անհանդուրժողականության, նույնիսկ՝ թշնամական մթնոլորտ:
Պառլամենտական երկիր հանդիսացող Հայաստանում կարծես ոչինչ չի փոխվել, հարցերն օրակարգ են մտցվում և որոշումները կայացվում են այլ տեղում, ինչն ինքնին անիմաստ է դարձնում իշխանության մյուս ճյուղերի աշխատանքն, այն ավելի շուտ ձևական է, կրում՝ իներտ բնույթ:
Այս իրավիճակը սխալ է, որևէ կերպ չի կարող նպաստել մեր երկրի բնականոն զարգացմանը, քանի որ խախտվում է իշխանության ճյուղերի հավասարակշռման, զսպման, հակազդման սկզբունքն ու վերջնաարդյունքում հանգեցնելու է մեկ անձի բացարձակ իշխանության: