2024 թվականի մարտի 29-ից տեղեկություններ են տարածվել, որ հայաթափված Ստեփանակերտում 7 ամիս մնալուց հետո Հայաստան են տեղափոխվել Սարգիս Գալստյանն ու կինը՝ Մարգարիտա Շահնազարյանը։ Այնուհետև՝ ապրիլի 3-ին, Գալստյանին լրտեսության համար մեղադրանք է առաջադրվել, և խափանման միջոց ընտրվել կալանքը։
Ի՞նչ ասել է լրտեսություն, և ի՞նչ հույժ գաղտնի տեղեկություններ է նա փոխանցել Ադրբեջանին՝ անգամ բարեկամներին հայտնի չէ:
«Ես նույնիսկ չգիտեի, որ նրանք Կարմիր խաչի միջնորդությամբ տեղափոխվում են Հայաստան, դրա մասին ոչ ոքի չէին ասել։ Լրատվամիջոցներից տեղեկանալով՝ հետաքրքրվել եմ ու տեսել, որ ճիշտ է։ Դրանից հետո Մարգարիտային եմ մեկ անգամ տեսել, ու նա ոչ մի բան չի պատմել։ Սարգսին կալանավորելուց հետո նրա ընտանիքի անդամները ոչ ոքի հետ չեն շփվում, անգամ դադարեցված են բարեկամների տներ փոխայցելությունները»,- MediaHub-ին ասաց ընտանիքի բարեկամներից մեկը։
Օկուպացված Արցախում բացված «Արցախ իմ սիրտ» ինստագրամյան օգտահաշիվը վաղուց չի գործում։ Մարգարիտա Շահնազարյանը հենց այդ էջի միջոցով էր որոշակի գումար աշխատում` Ստեփանակերտից տեսանյութեր հրապարակելով։ Սակայն, Ալիևների հաճախակի այցերի ֆոնին, էջը սկսել է չգործել։
«Երբ դեռ Ստեփանակերտում էին, հնարավոր էր խոսել իրենց հետ։ Շաբաթվա մեջ մի քանի անգամ խոսում էինք, մենք իրենց էինք ասում` «եկեք», իրենք էլ միշտ ասում էին՝ «բոլորդ եք հետ գալու»։ Հիմա եկել ու կապը խզել են մեզ հետ։ Նույնիսկ լսել եմ, որ Մարգարիտը վերապահումով է դուրս գալիս քաղաք։ Այլ մանրամասներ ինձ հայտնի չեն»,- հավելեց մեր զրուցակիցը։
Հիշեցնենք, ապրիլի սկզբին MediaHub-ը գրեց, որ Արցախի հայաթափումից հետո այնտեղ մնացած հաշված հայերից Սարգիս Գալստյանը, որի մասին մի պահ գրվեց, թե Ադրբեջանը նրան նշանակել է Ստեփանակերտի պարետ, Հայաստան վերադառնալուն պես Գորիսում ԱԱԾ կողմից ձերբակալվել է: Ապա հայտնի դարձավ, որ մեղադրվում է լրտեսության համար, և այդ օրվանից նրա մասին որևէ տեղեկություն չկա: