Թող նախաքննությունն ընթանա, վստահեցնում եմ, որ բոլոր մեղավորները քրեաիրավական պատասխանատվություն կկրեն։

Այս մասին լրագրողների հետ ճեպազրույցում ասաց ԱԺ ղեկավար Ալեն Սիմոնյանը, անդրադարձ կատարելով հունվարի 19-ի Ազատ գյուղի զինվորական կացարանում տեղի ունեցած ողբերգական հրդեհին, որի հետևանքով զոհվել է 15 ժամկետային զինծառայող, վիրավորվել՝ 3-ը:

«Պաշտպանության նախարարը որևիցէ ձևով այս ամենի հետ կապ ունենալ չի կարող, որովհետև իր գործառույթի մասով աշխատանքն ամբողջովին արել է. այդ քաղաքական շահարկումները շատ սին եմ համարում»,- ասաց ԱԺ ղեկավարը։ 

Վերջինս խոսեց Սուրեն Պապիկյանի իրականացարած բարեփոխումների մասին և այն պատասխանատվության, որ պատերազմից հետո Պապիկյանը վերցրել է իր վրա՝ դառնալով Պաշտպանության նախարար։ 

«Բարեփոխումներն են՝ սկսած անձնակազմի փոփոխությունից, վերջացրած կահավորումով, որը բոլոր տեղերում փոխվել է և փոխվում է: Հիմա էլ դրսից տարբեր որակի, բարձր մակարդակի կահավորում ենք ներմուծելու ՀՀ»,- ասաց Ալեն Սիմոնյանը, հավելելով, որ 2018 թվականից սկսած Հայաստանը գումարի խնդիր չունի բանակի վրա ծախսելու, կամ չի եղել դեպք, երբ գումարի պատճառով բանակի համար որևէ գնում չկատարեն։