Ռուսաստանն ակնկալում է, որ ԵԱՏՄ-ի և Իրանի միջև ազատ առևտրի համաձայնագիրը ուժի մեջ կմտնի 2025 թվականին, ինչը կմեծացնի Մոսկվայի և Թեհրանի միջև առևտրի ծավալները, ասել է ՌԴ փոխվարչապետ Ալեքսեյ Օվերչուկը։
«Մենք ակնկալում ենք, որ այն պետք է ուժի մեջ մտնի 2025 թվականին, բայց նույնիսկ այս համաձայնագրի ֆոնին երկու երկրների միջև առևտուրն աճում է, այս տարվա ինն ամսում այն արդեն աճել է 14,7 տոկոսով՝ հասնելով 3,3 միլիարդ ԱՄՆ դոլարի։ Սա շատ լավ աճ է»,- լրագրողներին ասել է նա։
Նրա խոսքով՝ համաձայնագրի ուժի մեջ մտնելն Իրանի և Ռուսաստանի Դաշնության համար կբացի ապրանքային գծերի ավելի քան 90 տոկոսը, ինչը լավ հնարավորություններ կստեղծի ապրանքաշրջանառության աճի համար։
Փոխվարչապետ Օվերչուկը նշել է, որ այս շաբաթ նախատեսված է Եվրասիական տնտեսական բարձրագույն խորհրդի նիստ, որտեղ օրակարգում է Իրանի՝ որպես դիտորդ միանալու հարցը։
Օվերչուկը նշել է, սա կարևոր քայլ է, քանի որ ԵԱՏՄ շրջանակներում դիտորդությունը պարտավորություններ չի դնում դիտորդ երկրի վրա, բայց միևնույն ժամանակ թույլ է տալիս նրան օգուտներ ստանալ ԵԱՏՄ գործունեության մասին տեղեկատվության տեսքով ու մասնակցել միության մարմինների աշխատանքներին։
«Այսինքն՝ Իրանը, մի կողմից, ստորագրելով ազատ առևտրի գոտու մասին համաձայնագիրը, մյուս կողմից՝ դառնալով դիտորդ, շատ լավ դիրք է գրավում Եվրասիական մայրցամաքում՝ մեծ շուկա մուտք գործելու առումով, որը ԵԱՏՄ-ն է»,- հավելել է նա։