SHAMSHYAN.com-ի տեղեկություններով՝ հուլիսի 21-ին արտակարգ դեպք է տեղի ունեցել Գեղարքունիքի մարզում։ Ժամը 20։20-ի սահմաններում ՀՀ Ներքին գործերի նախարարության ոստիկանության Սևանի բաժին են զանգահարել «Սևան» բժշկական կենտրոնից և հայտնել, որ Սևանի ավտոճանապարհին մեքենայի այրվելու հետևանքով «Դեմքի և զույգ վերին վերջույթների այրվածքներ, առաջին աստիճանի» ախտորոշմամբ իրենց մոտ բուժօգնության է դիմել մի քաղաքացի։

Ոստիկանները պարզել են, որ բուժօգնության տեղափոխված քաղաքացին Գեղարքունիքի մարզի բնակիչ 30-ամյա Գարիկ Պ․-ն է:

Պարզել են նաև, որ հուլիսի 21-ին՝ ժամը 19։15-ի սահմաններում, Գարիկ Պ․-ն Մարտունի քաղաք ընթանալիս հասնելով Սևան-Մարտունի-Գետափ 2 կմ հատվածում իր կողմից վարած և իրեն պատկանող «Mercedes» մակնիշի ավտոմեքենայի սրահում հրդեհ է բռնկվել և միաժամանակ պայթուն է տեղի ունեցել, որի հետևանքով ստացել է վերը նշված մարմնական վնասվածքը, և ըստ իրեն՝ պայթունը տեղի է ունեցել գազի արտահոսքի և հոսանքի լարերի կայծից:

Ֆոտոլրագրողի տեղեկություններով՝ Գարիկ Պ․-ն աշխատում է Մարտունի քաղաքում գտնվող «Նոյ Դենտ»-ում՝ որպես բժիշկ-ստոմատոլոգ։