Հնդկաստանի հյուսիսային Ուտար-Պրադեշ նահանգի գյուղերից մեկում կայծակի հետեւանքով զոհվել է յոթ մարդ, հիմնականում՝ ֆերմերներ՝ այս շաբաթ նահանգում զոհերի թիվը հասցնելով 49-ի, հայտնել է ոստիկանությունը, փոխանցում է AP-ն:

Հորդառատ մուսոնային անձրեւի ժամանակ ֆերմերները թաքնվել էին ծառերի տակ, երբ կայծակը հարվածել էր նրանց, նրանք անմիջապես մահացել են։

Նահանգի կառավարության պաշտոնական ներկայացուցիչ Շիշիր Սինգհի խոսքով՝ մահացությունների բարձր թիվը կառավարությանը ստիպել է նոր ուղեցույցներ հրապարակել այն մասին, թե ինչպես մարդիկ կարող են պաշտպանվել ամպրոպի ժամանակ:

Հնդկաստանում մուսոնների սեզոնը տեւում է հունիսից սեպտեմբեր:

Ապրիլից ի վեր Հնդկաստանում կայծակը մոտ 750 մարդու կյանք է խլել: